సమయం లేదు మురుగా..

అభిమానుల్లో ఎంత ఆసక్తి రేపుతోందో అంతకు అంత లేటవుతోంది మహేష్ లేటెస్ట్ సినిమా స్పైడర్. సుదీర్ఘ కాలంగా షూటింగ్ జరుపుకొంటున్న ఈ చిత్రాన్ని ఆగస్టు 11న రిలీజ్ చేయాలని నిర్ణయించారు. కానీ సినిమా షూటింగ్ మాత్రం ఇంతవరకు పూర్తి కాలేదు. ఈ సినిమా కోసం మహేష్ చాలా రోజులే కేటాయించాడు. కానీ షూటింగ్ ఓ పట్టాన కొలిక్కి రాకపోవడంతో డైరెక్టర్ మురుగదాస్ కు డెడ్ లైన్ పెట్డేశాడట

బ్రహ్మోత్సవం సినిమా మహేష్ అభిమానులను ఎంతగా నిరాశపరిచిందీ ప్రత్యేకంగా చెప్పాల్సిన పనిలేదు. గతేడాది ఇదే నెలలో రిలీజైన ఈ సినిమా పట్టుమని వారం కూడా థియేటర్లలో లేదు. ఈ సినిమా తర్వాత గబగబా మరో సినిమా పూర్తి చేయాలని అభిమానులు కోరుకున్నా మహేష్ మురుగదాస్ డైరెక్షన్ లో తెలుగు, తమిళంలో ఒకేసారి నిర్మించే చిత్రానికి పచ్చ జెండా ఊపాడు. ఈ సినిమాకు స్పైడర్ అని పేరు పెట్టిన తర్వాత అభిమానుల్లో క్రేజ్ మరింత ఎక్కువైంది. లెక్క ప్రకారమైతే ఈపాటికి స్పైడర్ పూర్తయి థియేటర్లకు వచ్చేయాలి. కానీ ఇంకా లాస్ట్ షెడ్యూల్ పెండింగ్ లో ఉంది. ప్ర్రస్తుతం హైదరాబాద్ లో షూటింగ్ జరుగుతోంది. రెండువారాల్లోగా పెండింగ్ పార్ట్ పూర్తి చేయాలని మహేష్ మురుగదాస్ కు కండిషన్ పెట్టాడని సమాచారం.

మహేష్ తో శ్రీమంతుడు సినిమాతో బంపర్ హిట్ కొట్టిన డైరెక్టర్ కొరటాల శివ మరోసారి మహేష్ తో సినిమా చేయాలని చాలారోజులుగా వెయిటింగ్ లో ఉన్నాడు. జనతా గ్యారేజ్ రిలీజ్ అయినప్పటి నుంచి మహేష్ డేట్స్ కోసం ఎదురుచూస్తున్నాడు. స్పైడర్ షూటింగ్ పూర్తయిన వెంటనే కొరటాల శివ సినిమా స్టార్ట్ చేయాలన్నది మహేష్ ప్లానింగ్. కాబట్టి మురుగదాస్ ను కంగారు పెట్టక తప్పదు.మరి.