శ్రీమంతుడా.. ఇక బ్రహ్మోత్సవం గావించవయ్యా

మహేష్ బాబు శ్రీమంతుడు సినిమాతో అభిమానుల హిట్ ఆకలిని తీర్చేశాడు. దర్శక నిర్మాతలు కుషీగానే వున్నారు. ఫలితంగా మహేష్ మరింత హ్యాపీ. ఈ సినిమా తనకు లైఫ్ అండ్ డెత్ కింద మారిందని మొన్నో ఇంటర్వ్యూ లో బయటపడ్డాడంటే పరిస్థితి ఎంతవరకూ వచ్చిందో అర్థం చేసుకోవచ్చు. శ్రీమంతుడు కోసం మహేష్ పడ్డ కష్టం ఏ మాత్రం వృథా కాలేదు. అంతవరకూ బాగానే వుంది తర్వాతి సినిమాపై ఇకనైనా మహేష్ దృష్టి సారిస్తే సంక్రాంతికి మరోసారి ప్రిన్స్ ని తెరమీద చూడొచ్చు.

సీతమ్మ వాకిట్లో సిరిమల్లె చెట్టు సినిమాతో దర్శకుడు శ్రీకాంత్ అడ్డాల పనితనానికి ఫిదా అయిన మహేష్ బ్రహ్మోత్సవం సినిమాతో మరోసారి అతగాడితో జతకట్టారు. కృష్ణ జన్మదినోత్సవంగా ఫస్ట్ లుక్ విడుదల చేశారు. ఇక అక్కడి నుండి ఇంచ్ కూడా ముందుకు కదల్లేదు ఈ సినిమా. శ్రీమంతుడు కలెక్షన్ల పరంగా బాగానే వున్నా ఇంకా మహేష్ వాటిని మరింత పెంచేలా ప్రమోషన్ చేస్తూనే వున్నారు. శ్రీకాంత్ మహేష్ ఎప్పుడు సెట్స్ మీదికి వస్తాడా అని కాచుకు కూర్చున్నాడు. ఇప్పటికైనా మహేష్ అటువైపు అడుగేస్తే బాగుణ్ణు. పైగా ఈ సినిమాని తెలుగుతో పాటు తమిళంలోనూ చిత్రీకరించనున్నారు. సెప్టెంబర్ 14 నుండి సెట్స్ మీదికి వెళ్తుందని చెప్పుకుంటున్నారు. ముందు ప్రకటించినట్టు సంక్రాoతి కార్డుతో పోస్టర్ పడుతుందో లేదో చూడాలి. మహేష్ ఎంత త్వరగా శ్రీమంతుడి కోట నుండి బయటపడితే అంత త్వరగా బ్రహ్మోత్సవం మొదలవుతుంది. అదీ అసలు సంగతి...!