ఇంత ఆనందంలోనూ ఎంత జాగ్రత్త మహేశ్

అమితమైన ఆనందంలో ఉన్నా.. ఆపుకోలేని దుంఖంలో ఉన్నా మాటల్లో కాస్త ఎక్కువ తక్కువలు కామన్.కానీ.. అలాంటి వేళల్లో కూడా బ్యాలెన్స్ మిస్ కాకుండా ఉండటం అంత ఈజీ కాదు. ఆ విషయంలో తానెంత జాగ్రత్తగా ఉంటానన్న విషయాన్ని తాజాగా చెప్పేశారు మహేశ్ బాబు. సరిలేరు నీకెవ్వరు చిత్రంతో సక్సెస్ ను సొంతం చేసుకున్న వేళ.. ట్విట్టర్ వేదిక మీదకు వచ్చారు. ఈ సందర్భంగా పలువురు అభిమానులు అడిగిన ప్రశ్నలకు స్పాంటేనియస్ గా సమాధానాలు ఇచ్చారు మహేశ్.

బ్లాక్ బస్టర్ కాఫీ ఎక్కడ తాగారన్న ప్రశ్నకు బదులిస్తూ.. ప్రతి సినిమా రిలీజ్ ముందు సెంటిమెంట్ గా అమ్మ కలిపి ఇచ్చే కాఫీ తాగుతానని.. బ్లాక్ బస్టర్ కాఫీ అంటే ఆవిడ కలిపి ఇచ్చేదన్న విషయాన్ని వెల్లడించారు. రెండేళ్లకోసారైనా మాస్ సినిమాలు కావాలన్న దానికి పాజిటివ్ గా రియాక్ట్ అయ్యారుమహేశ్. తనకు మాస్ సినిమా చేయాలనుకుంటున్న వేళ దర్శకుడు అనిల్ రావిపూడి చెప్పిన కథ విన్నంతనే ఫ్యాన్స్ ఏం కోరుకుంటున్నారో అవన్నీ ఉన్నట్లుగా తనకు అనిపించిందన్నారు.

సినిమా చేస్తున్నప్పుడు తాను తీసుకున్న నిర్ణయం సరైనదేనని అనిపించిందని.. అయితే.. ఇంత పెద్ద హిట్ అవుతుందని మాత్రం తాను ఊహించలేదన్నారు. మహేశ్ ఇలా ఉండాలి కదా అని అభిమానులు అనుకుంటున్నట్లు చెప్పారు. తనకు చాలా సంతోషంగా ఉందన్న మహేశ్.. ఇలానే మరిన్ని సినిమాలు చేస్తానని చెప్పారు

అభిమానులు అడుగుతున్న ప్రశ్నలకు సమాధానాలు ఇచ్చే క్రమంలో మహేశ్ తన గత సినిమాలన్ని స్పెషలేనని.. సరిలేరు నీకెవ్వరు చిత్రం మరింత ప్రత్యేకమన్నాడు. అయితే.. ఈ సినిమాకు రేటింగ్ ఎంత ఇస్తారన్న ప్రశ్నకు మాత్రం సమాధానం చెప్పకుండా స్కిప్ చేయటం చూస్తే.. ఎంత సంతోషంలో ఉన్నా.. బ్యాలెన్స్ మిస్ అయ్యేదే లేదన్న విషయాన్ని తన ఆన్సర్స్ తో చెప్పేశారని చెప్పాలి.