మహేష్ ఏమంటాడో అని చూస్తున్నాడట

భలే మంచి రోజు.. శ్రీరామ్ ఆదిత్య.. ప్రస్తుతం టాలీవుడ్లో ఈ రెండే హాట్ టాపిక్స్. తొలి సినిమాతో హిట్టు కొట్టడమే కాదు.. విమర్శకుల ప్రశంసలు కూడా దక్కించుకున్నాడు శ్రీరామ్. ఇండస్ట్రీ అంతా ఈ కుర్రాడిపై ప్రశంసల జల్లు కురిపిస్తోంది. ఈ ప్రశంసల్లో తడిసి ముద్దవుతున్న శ్రీరామ్.. మీడియాతో తన ఆనందాన్ని పంచుకున్నాడు. సినిమా బాగుందని పెద్ద పెద్ద వాళ్ల నుంచి కాంప్లిమెంట్స్ అందుకున్నానని.. ఐతే సుధీర్ బావమరిది మహేష్ బాబు ఈ సినిమా చూసి ఏమంటాడా అని ఆసక్తి ఎదురు చూస్తున్నానని శ్రీరామ్ చెప్పాడు.

‘‘మా సినిమాకు అద్భుత స్పందన వస్తోంది. ఈ కథపై, సినిమాపై మొదట్నుంచి ఎంతో కాన్ఫిడెన్స్ ఉన్నప్పటికీ.. జనాల నుంచి ఈ స్థాయిలో రెస్పాన్స్ వస్తుందని ఊహించలేదు. ఈ ఫీలింగ్ మాటల్లో చెప్పలేకపోతున్నా. రవితేజ గారు సినిమా చూసి మెచ్చుకున్నారు. ఇక మహేష్, ప్రభాస్‌ మాకు మొదట్నుంచీ మంచి సపోర్ట్ ఇస్తూ వచ్చారు. సినిమా విషయంలో ప్రభాస్ సలహాల్ని ఎప్పటికీ మరచిపోలేను. మహేష్ గారు సినిమా సక్సెస్ అయినందుకు మాకు కంగ్రాట్స్ చెప్పారు. ఆయన వెకేషన్ నుంచి తిరిగొచ్చాక సినిమా చూస్తానన్నారు. సినిమా చూశాక ఆయన ఏమంటారో వినాలని ఆసక్తిగా ఎదురుచూస్తున్నా’’ అని శ్రీరామ్ చెప్పాడు. తన తర్వాతి సినిమా విషయంలో ఇంకా ఏమీ అనుకోలేదని.. ప్రస్తుతానికి తన దగ్గర నాలుగైదు కథలు సిద్ధంగా ఉన్నాయని.. ‘భలే మంచి రోజు’ విజయానందం నుంచి బయటకొచ్చాక తర్వాతి సినిమా గురించి ఆలోచిస్తానని శ్రీరామ్ చెప్పాడు.