మహేష్.. దేశం చుట్టిన వీరుడు

నాలుగు రోజుల ముందు వరకు మహేష్ మౌనం చూసి అందరూ ఆశ్చర్యపోయారు. ‘స్పైడర్’ రిలీజ్ డేట్ దగ్గర పడుతున్నా మహేష్ కదలడేంటి.. ప్రమోషన్ల గురించి ఆలోచించడేంటి అని చర్చించుకున్నారు. కానీ ఇప్పుడు మహేష్ చూపిస్తున్న జోరుకు అందరూ షాకైపోతున్నారు. గత మూడు రోజుల నుంచి కాలికి బలపం కట్టుకుని ఇండస్ట్రీ ఇండస్ట్రీకి తిరిగేస్తున్నాడు మహేష్. ఒకే రోజు రెండు మూడు నగరాల్లో ప్రత్యక్షమవుతూ... ప్రింట్ - టీవీ - వెబ్ మీడియాల్ని కవర్ చేస్తూ.. ఇటు అటు షటిల్ సర్వీసులు చేస్తూ అతను ఆశ్చర్యపరుస్తున్నాడు. చెన్నై - హైదరాబాద్ - బెంగళూరులతో పాటు ఉత్తరాదిన కూడా అతను పర్యటించేశాడు.

ముందుగా చెన్నైలో టీవీ ఛానెళ్లను కలవడంతో మహేష్ ప్రమోషన్ మొదలైంది. ఆ తర్వాత హైదరాబాద్ వచ్చి ప్రింట్ మీడియాను కలిశాడు. మళ్లీ చెన్నై వెళ్లి విలేకరుల సమావేశంలో పాల్గొన్నాడు. అక్కడి పత్రికలకు ప్రత్యేక ఇంటర్వ్యూలిచ్చాడు. మళ్లొచ్చి హైదరాబాద్‌ లో టీవీ ఛానెళ్లతో చిట్ చాట్ జరిపాడు. వన్ టు వన్ ఇంటర్వ్యూలిచ్చాడు. ఐతే తెలుగు - తమిళ భాషల్లో ఈ సినిమా రిలీజవుతోంది కాబట్టి తెలుగు రాష్ట్రాలు - తమిళనాడు వరకే మహేష్ పరిమితం కాలేదు. కర్ణాటకలోనూ సినిమా భారీ స్థాయిలో రిలీజవుతుంది కాబట్టి బెంగళూరుకు కూడా వెళ్లాడు. అక్కడి మీడియాతోనూ మాట్లాడాడు. ఇప్పుడు నేషనల్ లెవెల్లో మంచి పేరున్న టాప్ క్రిటిక్స్ రాజీవ్ మసంద్ - అనుపమ చోప్రాలకు ఇంటర్వ్యూలిచ్చి ఉత్తరాది వాళ్లను కూడా కవర్ చేశాడు. ‘స్పైడర్’ను ఉత్తరాదిన కూడా కొంచెం పెద్ద స్థాయిలో రిలీజ్ చేస్తున్న సంగతి తెలిసిందే. మొత్తానికి ‘స్పైడర్’ కోసం దేశమంతటా పర్యటిస్తూ.. ఓపిగ్గా మీడియాతో మాట్లాడుతూ.. ఇంటర్వ్యూలిస్తున్న మహేష్ ది మామూలు ఎనర్జీ కాదనే చెప్పాలి.