మహేష్ బాబు ‘తమిళ’ ప్రేమ

పొరుగు భాషలకు చెందిన హీరోలు మన మార్కెట్ ను దున్నేస్తుంటే చూస్తూ ఉండిపోయిన మన హీరోలకు.. మన సినిమాల్ని కూడా పొరుగు భాషల్లో మార్కెట్ చేసుకోవాలనే స్పృహ ఈ మధ్యే కలుగుతోంది. ఒక్కొక్కరుగా బౌండరీలను చెరిపేస్తూ వేరే రాష్ట్రాల్లోకి వెళ్తున్నారు. అక్కడ ఫాలోయింగ్ సంపాదించుకుంటున్నారు. ఇప్పుడు మహేష్ బాబు కూడా ఆ పనిలోనే ఉన్నాడు. తమిళంలో మార్కెట్ కోసం ఒక పెద్ద అడుగు వేస్తున్నాడు మహేష్. మిగతా వాళ్లలాగా ఇక్కడ సినిమా తీసి.. అనువాదం చేసి రిలీజ్ చేయడం కాకుండా పెద్ద స్థాయిలో ద్విభాషా చిత్రమే చేశాడు. మురుగదాస్ లాంటి స్టార్ డైరెక్టర్ని పెట్టుకుని అతను చేసిన ‘స్పైడర్’ తమిళ ప్రేక్షకుల దృష్టిని కూడా బాగానే ఆకర్షిస్తోంది.

ముందు నుంచి తమిళంలో ఈ సినిమాను ప్రమోట్ చేయడానికి ప్రత్యేక ప్రణాళికలతో వెళ్తున్నాడు మహేష్. ఇందుకోసం ఆల్రెడీ తమిళ మీడియాకు ప్రత్యేక ఇంటర్వ్యూలు కూడా ఇచ్చాడు. సెప్టెంబరు 9న చెన్నైలో ఒక భారీ కార్యక్రమం ద్వారా కోలీవుడ్ లోకి మహేష్ ఆగమనాన్ని ఘనంగా చాటేందుకు సన్నాహాలు జరుగుతున్నాయి. సూపర్ స్టార్ రజినీకాంత్ ఈ కార్యక్రమానికి ముఖ్య అతిథిగా హాజరవుతాడని సమాచారం. ఈ కార్యక్రమం కోసం చాలా పెద్ద ఆడిటోరియాన్నే బుక్ చేశారు. తమిళ పరిశ్రమ నుంచి ఇంకా కొందరు అతిరథ మహారథులు వస్తారట. ఆ రోజే ‘స్పైడర్’ థియేట్రికల్ ట్రైలర్ కూడా లాంచ్ చేయబోతున్నారు. తెలుగు ట్రైలర్ ను మామూలుగా ఆన్ లైన్లో రిలీజ్ చేసేసి.. తమిళ ట్రైలర్ ను మాత్రం ఆ వేడుకలో ఘనంగా లాంచ్ చేయబోతున్నట్లు సమాచారం. ఈ సినిమా కోసం చాలామంది తమిళ నటీనటులు.. సాంకేతిక నిపుణులు పని చేసిన సంగతి తెలిసిందే. మొత్తానికి తన తొలి తమిళ సినిమా కోసం మహేష్ చూపిస్తున్న శ్రద్ధ అతడికి అక్కడ ఎలాంటి ఫలితాన్నిస్తుందో చూడాలి.