మ‌హేష్ `పోకిరి` పెద్ద చిక్కే తెచ్చిపెట్టిందే!

సూప‌ర్ స్టార్ మ‌హేష్ బాబు న‌టించిన ఇండ‌స్ట్రీ హిట్ `పోకిరి` మిగ‌తా స్టార్ హీరోలకు పెద్ద చిక్కుని తెచ్చిపెట్టింది. దాదాపు ప‌ద‌హారేళ్ల క్రితం మ‌హేష్ బాబు, పూరి జ‌గ‌న్నాథ్ ల క‌ల‌యిక‌లో వ‌చ్చిన ఈ మూవీ తెలుగు సినిమా ఇండ‌స్ట్రీ రికార్డుల్ని తిర‌గ‌రాసింది. మ‌హేష్ లోకి కొత్త కోణాన్ని ప‌రిచ‌యం చేసింది. మేకోవ‌ర్ ప‌రంగానూ ఈ మూవీలో ఫ్యాన్స్ కొత్త మ‌హేష్ ని చూశారు. యాక్టింగ్‌, డైలాగ్ డెలివ‌రీ, మేకోవ‌ర్ ల ప‌రంగా చాలా కొత్త గా మహేష్ క‌నిపించారు.

ఇండస్ట్రీ హిట్ గా స‌రికొత్త రికార్డుల్ని సొంతం చేసుకున్న ఈ మూవీ ఇప్ప‌టికే మ‌హేష్ కేరీర్ లో అత్య‌ధిక రికార్డుల‌ని సొంతం చేసుకున్న మూవీగా నిలిచింది. ఇదిలా వుంటే ఈ మూవీని 4 కెలోకి క‌న్వ‌ర్ష‌న్ చేసి స‌రికొత్త హంగుల‌తో సిద్ధం చేశారు. ఈ ప్రింట్ ని సూప‌ర్ స్టార్ మ‌హేష్ పుట్టిన రోజు సంద‌ర్భంగా ఆగ‌స్టు 9న ప్ర‌త్యేకంగా విడుద‌ల చేయ‌బోతున్నారు. స్పెష‌ల్ ప్రీమియ‌ర్స్ ని కూడా ఇప్ప‌టికే ప్ర‌క‌టించేశారు. ప్రీమియ‌ర్ టికెట్స్ కూడా రికార్డు స్థాయిలో బుక్ అయిపోవ‌డం విశేషం.

ఇక ఈ మూవీతో పాటు మ‌హేష్ న‌టించిన మ‌రో బ్లాక్ బ‌స్ట‌ర్ మూవీ `ఒక్క‌డు`ని కూడా రిలీజ్ చేయ‌బోతున్నారు. ఇలా సూప‌ర్ స్టార్ మ‌హేష్ బాబుకు సంబంధించిన క్రేజీ బ్లాక్ బ‌స్ట‌ర్లు థియేట‌ర్ల‌లో బ‌ర్త్ డే స్పెష‌ల్ గా రిలీజ్ అవుతున్న నేప‌థ్యంలో మిగ‌తా హీరోల ఫ్యాన్స్ లో ఆస‌క్తిక‌ర చ‌ర్చ మొద‌లైంది. మా హీరోల సినిమాలు కూడా ఇలాగే విడుద‌ల చేస్తే చూడాల‌ని వుంద‌ని నెట్టింట రిక్వెస్ట్ లు చేస్తున్నారు. ప‌వ‌న్ క‌ల్యాణ్‌, ప్ర‌భాస్ ల అభిమానులు ఇప్ప‌డు నెట్టింట మా హీరోల సినిమాలు కూడా ఇలాగే రిలీజ్ చేయాల‌ని డిమాండ్ చేస్తున్నారు.

ప్ర‌భాస్ న‌టించిన `వ‌ర్షం` ఏ స్థాయిలో బ్లాక్ బ‌స్ట‌ర్ హిట్ గా నిలిచిందో, ప్ర‌భాస్ కెరీర్ ని ఎలా మ‌లుపు లిప్పిందో అంద‌రికి తెలిసిందే. ఈ మూవీని కూడా 4 కె లోకి క‌న్వ‌ర్ష‌న్ చేసి పుట్టిన రోజు సంద‌ర్భంగా ప్ర‌త్యేకంగా విడుద‌ల చేయాల‌ని ప్ర‌భాస్ ఫ్యాన్స్ డిమాండ్ చేయ‌డం చ‌ర్చ‌నీయాంశంగా మారింది. వీరి త‌ర‌హాలోనే ప‌వ‌న్ క‌ల్యాణ్ ఫ్యాన్స్ కూడా `జ‌ల్సా` మూవీని అలాగే విడుద‌ల చేయ‌మ‌ని డిమాండ్ చేస్తున్నారు.

అయితే ఈ మూవీ మాస్ట‌ర్ ప్రింట్ మిస్స‌యింద‌ని, అది ల‌భించ‌గానే అలాగే రిలీజ్ చేస్తామ‌ని గీతా ఆర్ట్స్ వ‌ర్గాలు స‌మాధానం చెప్పాయి. తాజాగా రామ్ చ‌ర‌ణ్ న‌టించిన `మ‌గ‌ధీర` మూవీ విడుద‌లై జూలై 31 నాటికి 13 ఏళ్లు కావ‌స్తోంది. ఈ నేప‌థ్యంలో ఈ మూవీ పోస్ట‌ర్ ని ఆదివారం గీతార్ట్స్ వ‌ర్గాలు షేర్ చేసి టాలీవుడ్ గేమ్ ఛేంజ‌ర్ అంటూ సౌత్ ఇండియాలోనే ఇది బిగ్గెస్ట్ బ్లాక్ బ‌స్ట‌ర్ గా నిలిచింద‌ని ట్వీట్ చేశారు. వెంట‌నే మెగా ఫ్యాన్స్ 4కెలో ఈ మూవీని ఎప్పుడు రిలీజ్ చేస్తారంటూ కామెంట్ లు చేయ‌డం మొద‌లు పెట్టారు. ఈ వ‌రుస చూసిన వారంతా మ‌హేష్ పోకిరి పెద్ద చిక్కే తెచ్చిపెట్టిందే` అంటూ కామెంట్ లు చేస్తున్నారు.