మహేశ్ ను జ్ఞాపకాల్లోకి నెట్టిన 'పేపర్ బాయ్'

ప్రస్తుతం టాలీవుడ్ లో ‘పేపర్ బాయ్’ అనే సినిమా భలే ట్రెండింగ్ అవుతోంది. దర్శకుడు సంపత్ నంది రచన, నిర్మాణంలో ఈ మూవీ తెరకెక్కుతుండడం ఒక విశేషమైతే.. దివంగత దర్శకుడు శోభన్ తనయుడు సంతోష్ శోభన్ కు హీరోగా ఇదే తొలి చిత్రమవడం మరో విశేషం. అయితే ఈ సినిమాకి ఇప్పుడో ప్రత్యేకత కూడా యాడయింది. అదేంటంటే.. ఇటీవల విడుదలైన ఈ సినిమా ట్రైలర్ ను సూపర్ స్టార్ మహేశ్ బాబు చూసి.. చిత్ర బృందాన్ని అప్రిషియేట్ చేశాడు. దాంతోపాటు సంతోష్ శోభన్ తండ్రి దర్శకుడు శోభన్ ను కూడా గుర్తుచేసుకున్నాడు. గతంలో మహేశ్ బాబు శోభన్ దర్శకత్వంలో ‘బాబీ’ అనే మూవీలో నటించాడు. ఆ సినిమా అనుకున్నంత రీతిలో సక్సెస్ కాలేకపోయినా.. మహేశ్ బాబు ఆ దర్శకుడ్ని గుర్తుపెట్టుకొని మరీ ..పేపర్ బాయ్ చిత్రం గురించి రెండు మంచి మాటలు చెప్పడం అందరినీ ఆకట్టుకుంటోంది.

‘పేపర్ బాయ్ ట్రైలర్ ను ఇప్పుడే చూశాను. చూడ్డానికి చాలా అందంగా, ఆహ్లాదకరంగా ఉంది. వ్యక్తిగతంగా చెప్పాలంటే.. సంతోష్ తండ్రి శోభన్ గారితో నేను పనిచేయడం వల్ల ఇది నా హృదయాన్ని ఎక్కడో తాకింది. ఈ సందర్భంగా సంతోష్ శోభన్ ను , ఈ చిత్ర బృందానికి విషెస్ చెబుతున్నాను’ అంటూ ట్విట్టర్ లో తన అభిప్రాయాన్ని తెలిపాడు మహేశ్ బాబు. ఆగస్ట్ 31న విడుదలకు సిద్ధమవుతోన్న ‘పేపర్ బాయ్’ మూవీ ని కొత్త దర్శకుడు జయశంకర్ తెరకెక్కిస్తున్నాడు. మరి ఈ సినిమాకి మహేశ్ ట్వీట్ ఏ స్థాయిలో హెల్ప్ అవుతుందో చూడాలి.