మహేష్‌ మళ్లీ హీరోయిన్ని పొగిడేశాడు

తన పక్కన నటించే హీరోయిన్లని ఆకాశానికెత్తేస్తుంటాడని మహేష్‌పై ఓ కంప్లైట్‌ ఉంది. పూరి జగన్నాథ్‌లాంటి దర్శకుడైతే ఆ విషయంపై మహేష్‌ని సరదాగా ఆటపట్టిస్తుంటాడు. మహేష్‌ ఎప్పుడెప్పుడు ఏయే హీరోయిన్లని ఎలా పొగిడాడో పూరి జగన్నాథ్‌ 'బిజినెస్‌మేన్‌' ఆడియో వేడుకలో ఏకంగా ఓ వీడియో కట్‌ చేసి చూపించాడు. ఆ వీడియో చూసి అందరూ తెగ నవ్వేసుకొన్నారు అప్పట్లో. తన హీరోయిన్లందర్నీ ఫెంటాస్టిక్‌ యాక్ట్రెస్‌, వండర్‌ఫుల్‌ హీరోయిన్‌ అని ఆ వీడియోలో పొగిడాడు మహేష్‌. ఆ వీడియోని స్వయంగా మహేష్‌ కూడా చూసుకొని నవ్వుకొన్నాడు. అయితే మహేష్‌ ఇప్పటికీ తన హీరోయిన్లని పొగడటం మానడం లేదు.

ఇటీవల రెయిన్‌బో హాస్పిటల్‌లో జరిగిన ఓ చిన్న పిల్లల కార్యక్రమానికి హాజరైన మహేష్‌బాబు ఓ టీవీ ఛానల్‌తో మాట్లాడాడు. శ్రుతిహాసన్‌ గురించి చెబుతూ బ్రిలియంట్‌ యాక్ట్రెస్‌ అని పొగిడేశాడు. కమల్‌హాసన్‌కి తాను పెద్ద అభిమానిననీ, ఆయన కూతురుతో నటించడం ఆనందంగా ఉందని మహేష్‌ చెప్పుకొచ్చాడు. మహేష్‌ ఎంత పెద్ద స్టార్‌ అయినప్పటికీ తన పక్కన నటించే హీరోయిన్ల గురించి ఇలా గొప్పగా చెప్పడం అందరినీ ఆకట్టుకుంటుంది. తనకి కూడా బాహుబలిలాంటి స్క్రిప్ట్‌ వస్తే చేయడానికి రెడీనే అన్నారు. సినిమా అనేది దర్శకుడి విజన్‌ అనీ, నేను అలాంటి పాత్రలకు సరిపోతానని దర్శకుడు అనుకొంటే చేయడానికి రెడీనే అని చెప్పుకొచ్చాడు మహేష్‌బాబు.