మహేష్ బాబు 'ప్రిన్స్'గా మారి నేటికి 21యేళ్లు..!!

కరోనా మహమ్మారి ప్రపంచవ్యాప్తంగా ప్రజలందరిని కూడా లాక్ చేసేసింది. సెలబ్రిటీలు.. సామాన్యులు అనే తేడా లేకుండా అందరు ఇళ్లకే పరిమితం అయ్యారు. దీంతో ఎప్పుడూ షూటింగ్స్, సినిమాలంటూ దేశ విదేశాలకు ఇతర ప్రాంతాలకు తిరిగే సినీతారలు సైతం ఇళ్లలోనే టైంపాస్ చేస్తూ.. ఫ్యామిలీతో హ్యాపీగా ఎంజాయ్ చేస్తున్నారు. ఇలాంటి వేళ తమ ఇంట్లో జరుగుతున్న విశేషాలన్నీ సోషల్ మీడయాలో షేర్ చేస్తున్నారు. నిజానికి టాలీవుడ్ సూపర్ స్టార్ మహేష్ బాబు లాక్ డౌన్ ఉన్నా లేకపోయినా సోషల్ మీడియాలో ఎల్లప్పుడూ చాలా యాక్టివ్‌గా ఉంటారు. అయితే ఈరోజు మహేష్ బాబు కెరీర్లో చాలా ప్రత్యేకమైన రోజట. ఎందుకంటే బాలనటుడి నుండి ప్రిన్స్ గా.. నేడు టాలీవుడ్ సూపర్ స్టార్ గా మహేష్ ఎదిగారు. అయితే నేడు జులై 30.. అంటే మహేష్ ఫస్ట్ సినిమా 'రాజకుమారుడు' విడుదలైన రోజు. నేటికి 21 సంవత్సరాలు పూర్తి చేసుకుంది.

వైజయంతి బ్యానర్ పై సి.అశ్వినిదత్ మహేష్ బాబును హీరోగా తెలుగుతెరకు పరిచయం చేశారు. ఇక దర్శకేంద్రుడు రాఘవేంద్రరావు దర్శకత్వంలో తెరకెక్కిన ఈ సినిమాలో ప్రీతిజింటా హీరోయినుగా నటించింది. అయితే రాజకుమారుడు సినిమా విజయంలో కీలక పాత్ర పోషించింది సంగీతం కూడా చెప్పాలి. మణిశర్మ అందించిన బాణీలు ఇప్పటికి శ్రోతలను అలరిస్తూనే ఉంటాయి. అయితే ఈ సినిమా షూటింగ్ 'గోదారి గట్టుపైన' అనే పాటతో ప్రారంభించారట. ఈ సందర్భంగా సూపర్ స్టార్ మహేష్ బాబు ట్విట్టర్ ద్వారా దర్శకేంద్రుడికి కృతజ్ఞతలు తెలియజేసాడు. ఈరోజును స్పెషల్ డేగా మార్చినందుకు కృతజ్ఞతలు. అలాగే మీ నుండి ఎన్నో నేర్చుకున్నాను. మొదటి సినిమానే మీతో కలిసి పనిచేయడం చాలా ఆనందంగా ఉందని మహేష్ పేర్కొన్నాడు. అలాగే రాజకుమారుడు షూటింగ్ స్టిల్ ఒకటి షేర్ చేశాడు మహేష్. ప్రస్తుతం ఈ త్రోబ్యాక్ పిక్ సోషల్ మీడియాలో వైరల్ అవుతోంది.