మహేష్ ఆ క్లబ్బులో చేరిపోయాడు

ప్రిన్స్ మహేష్ బాబు.. ట్విట్టర్లో తెలుగు హీరోలెవ్వరికీ సాధ్యం కాని ఘనతను సొంతం చేసుకున్నాడు. మహేష్ ట్విట్టర్ ఫాలోయర్ల సంఖ్య 20 లక్షలకు చేరుకుంది. సౌత్ ఇండియాలో 2 మిలియన్ మార్కు అందుకున్న అతి కొద్ది మంది హీరోల్లో మహేష్ ఒకడు. మహేష్ ఒకప్పుడు ట్విట్టర్లో చాలా యాక్టివ్ గా ఉండేవాడు కానీ.. గత రెండేళ్లలో జోరు తగ్గించేశాడు. ట్విట్టర్లో యాక్టివ్ గా ఉంటేనే ఫాలోయర్లు పెరుగుతారు. మహేష్ ఎప్పుడో ఒకసారి మాత్రమే ట్వీట్ చేస్తున్నాడు ఈ మధ్య. అయినప్పటికీ వేగంగానే 2 మిలియన్ మార్కు అందుకున్నాడు.

టాలీవుడ్ హీరోల్లో మహేష్ తర్వాతి స్థానం రానా దగ్గుబాటిదే. అతడికి 15.8 లక్షల మంది ఫాలోయర్లున్నారు. అక్కినేని నాగార్జున 14.2 లక్షల మంది ఫాలోయర్లతో మూడో స్థానంలో ఉన్నాడు. పవన్ కళ్యాణ్ ను 8.58 లక్షల మంది.. అల్లు అర్జున్ ను 6.16 లక్షల మంది అనుసరిస్తున్నారు. వీళ్లిద్దరూ గత ఏడాదే ట్విట్టర్లోకి వచ్చారు. ఐతే హీరోలతో పోలిస్తే హీరోయిన్లకే ట్విట్టర్లో మంచి ఫాలోయింగ్ ఉంది. త్రిష 25 లక్షల మంది ఫాలోయర్లతో.. సమంత 21 లక్షల మంది ఫాలోయర్లతో కొనసాగుతుండటం విశేషం. ఐతే వాళ్లిద్దరూ ఎప్పట్నుంచో ట్విట్టర్లో ఉన్నారు.. పైగా యాక్టివ్ గా ఉంటారు. రెండు భాషల్లోనూ ఫాలోయింగ్ కూడా ఉంది. మన దర్శకుల్లో రాజమౌళి 19.7 లక్షల మందితో ఉన్నాడు. 2 మిలియన్ మార్కుకు దగ్గరవుతున్నాడు. రామ్ గోపాల్ వర్మను 17.3 లక్షల మంది అనుసరిస్తున్నారు.