వాళ్లకు మహేష్ తోడయ్యాడు

రామ్ చరణ్ హీరోగా సుకుమార్ డైరెక్షన్ లో వచ్చిన రంగస్థలం మూవీ బాక్సాఫీస్ వద్ద రచ్చ చేస్తోంది. ఈ సినిమాలకు కలెక్షన్లు ఏ స్థాయిలో వస్తున్నాయో ప్రశంసలు కూడా అదే రేంజిలో వస్తున్నాయి. ఈ సినిమాలో నటించిన యాక్టర్ల కంటే వాళ్లు చేసిన పాత్రలే ప్రేక్షకులకు గుర్తుండిపోతున్నాయంటే అందరూ ఏ రేంజిలో నటించారో అర్ధం చేసుకోవచ్చు.

అందుకే రంగస్థలం చూసిన సెలబ్రిటీలంతా సినిమా టీంను కాంప్లిమెంట్లలో ముంచెత్తుతున్నారు. తాజాగా ఇందులో హీరో మహేష్ బాబు కూడా యాడయ్యాడు. ఈ సినిమా చూసొచ్చి మూవీ కోసం పనిచేసిన ముఖ్యమైన వాళ్లందరినీ సోషల్ మీడియా ద్వారా తెగ మెచ్చుకున్నాడు. ‘‘రంగస్థలం మూవీ రా.. రస్టిక్ అండ్ ఇంటెన్స్ గా ఉంది. సుకుమార్ నిజంగా మాస్టర్ ఆఫ్ ది ఆర్ట్. మ్యూజిక్ డైరెక్టర్ దేవిశ్రీ ప్రసాద్ రాక్ స్టార్ గా తన సత్తా చాటుకున్నాడు. రత్నవేలు వర్క్ ఎప్పటిలా చాలా బ్రిలియంట్ గా ఉంది. మైత్రీ మూవీస్ టీం మరో ఘన విజయం సాధించారు’’ అంటూ తన అభినందనలు తెలిపాడు.

సినిమాలో హీరో హీరోయిన్లుగా నటించిన రామ్ చరణ్ అండ్ సమంత కెరీర్ లో తొలిసారి రూరల్ బ్యాక్ డ్రాప్ గా ఉండే క్యారెక్టర్లు చేశారు. తమ కెరీర్ లో గుర్తుండిపోయే సినిమా రంగస్థలమని వాళ్లిద్దరూ ఇప్పటికే స్టేట్ మెంట్ ఇచ్చారు. ఇప్పుడు ఇదే మాట మహేష్ కూడా చెప్పుకొచ్చాడు. ‘‘రామ్ చరణ్ అండ్ సమంతలకు ఇదే కెరీర్ లోనే బెస్ట్ పెర్ఫార్మెన్స్ అని ఖచ్చితంగా చెప్పగలను. టీం మొత్తానికి కంగ్రాచ్యులేషన్స్. సినిమా బాగా ఎంజాయ్ చేయగలిగాను’’ అంటూ మహేష్ ట్వీట్ చేశాడు.