ఎమ్మెల్యే కొరటాల.. ఎప్పుడో?

సినిమా వాళ్లు రాజకీయాల్లోకి రావడం.. ఎమ్మెల్యేలు.. ఎంపీలు అయిపోవడం.. పెద్ద స్థాయికి చేరుకోవడం ఎప్పట్నుంచో చూస్తున్నాం. ఐతే సినీ రంగం నుంచి చాలా వరకు నటీనటులే రాజకీయాల వైపు అడుగులేస్తుంటారు. తమకున్న ఆకర్షణను వాళ్లు ఓట్లుగా మార్చుకుంటుంటారు. చాలా వరకు టెక్నీషియన్లు రాజకీయాల్లోకి రారు. ఈ జాబితా చాలా చిన్నగానే ఉంటుంది. ఆ చిన్న జాబితాలో తన పేరు చేర్చుకోవాలని టాలీవుడ్ స్టార్ డైరెక్టర్ కొరటాల శివ ఆశ పడుతున్నట్లు తెలుస్తోంది. కొరటాలకు ఉన్న ఈ ఆశ గురించి మహేష్ బాబు వెల్లడించడం విశేషం.

తెలంగాణ మంత్రి కేటీఆర్ తో కలిసి మహేష్.. కొరటాల ఒక చర్చా కార్యక్రమంలో పాల్గొన్న సంగతి తెలిసిందే. ఈ సందర్భంగా మహేష్ కొరటాల పొలిటికల్ ప్లాన్స్ గురించి వెల్లడించాడు. తనకు రాజకీయాల గురించి ఏమీ తెలియదని.. కానీ కొరటాలకు చాలా అవగాహన.. పరిజ్ఞానం ఉందని.. భవిష్యత్తులో ఎమ్మెల్యే కావాలని అనుకుంటున్నట్లుగా ఒక సందర్భంలో తనకు కొరటాల వెల్లడించాడని మహేష్ బాబు తెలిపాడు. మహేష్ ఈ మాట అనగానే కేటీఆర్ ఒకింత ఆశ్చర్యపోతూ.. ఎమ్మెల్యే అంటే ‘మంచి లక్షణాలున్న అబ్బాయి’ అంతేనా అని అనడంతో అందరూ నవ్వేశారు.

మరోవైపు ఈ కార్యక్రమంలో మహేష్-కేటీఆర్ చాలా సరదాగా వ్యవహరిస్తూ జోకులు పేలుస్తూ అలరించారు. కేటీఆర్ ఎప్పుడూ ముక్కుసూటిగా తన సినిమాల విషయంలో అభిప్రాయాలు చెబుతాడని అంటూ.. ‘ఆగడు’ సినిమా చూసి ఇలాంటి నాన్సెన్స్ కట్టిపెట్టాలన్న విషయాన్ని గుర్తు చేసుకున్నాడు మహేష్. మరోవైపు కేటీఆర్ మాట్లాడుతూ.. మహేష్ ఎప్పుడూ తన భార్యాపిల్లల్ని వెకేషన్‌కు తీసుకెళ్తుంటాడని.. ఇలా మీరెందుకు చేయరంటూ తన పిల్లలు తనను ప్రశ్నిస్తుంటారని కేటీఆర్ నవ్వుతూ చెప్పాడు.