ఇక లాభం లేదు .. మహేశ్ బాబే క్లారిటీ ఇవ్వాలి!

గత మూడేళ్లుగా మహేశ్ బాబు వరుస హిట్లతో దుమ్మురేస్తున్నాడు. వచ్చే ఏడాది కూడా ఒక బ్లాక్ బస్టర్ ను నమోదు చేయాలనే ఆలోచనలోనే ఉన్నాడు. ఆ దిశగానే 'సర్కారువారి పాట' ప్రాజెక్టును నడిపిస్తున్నాడు. పరశురామ్ దర్శకత్వం వహిస్తున్న ఈ సినిమాలో కథానాయికగా కీర్తి సురేశ్ మెరవనుంది. 'సర్కారువారి పాట' అనే టైటిల్ చూసి .. వేలంపాటను చూడటానికి వెళ్లేదేవుందిలే అనుకుంటారేమోనని, ఇది నాన్ స్టాప్ ఎంటర్టైనర్ అనే విషయాన్ని దర్శక నిర్మాతలు ముందునుంచే చెబుతున్నారు.

ఇక ఈ సినిమా తరువాత మహేశ్ బాబు ఏ దర్శకుడితో చేయనున్నాడనేది ఎవరికీ తెలియదు .. ఎందుకంటే ఆయనే ఎవరికీ చెప్పలేదు. 'సర్కారువారి పాట' తరువాత మహేశ్ బాబు సినిమా 'రాజమౌళి'తో ఉండనుందనే ప్రచారం జరిగింది. 'ఆర్ ఆర్ ఆర్' ను రాజమౌళి ఇంకా బయటికి పంపించలేదు గనుక, ఆయన నెక్స్ట్ ప్రాజెక్టు మరింత ఆలస్యం కావొచ్చని అన్నారు. ఆ వెంటనే మహేశ్ తదుపరి సినిమా దర్శకుడిగా 'త్రివిక్రమ్' పేరు వినిపించింది. 15 సంవత్సరాల క్రితం త్రివిక్రమ్ దర్శకత్వంలో మహేశ్ బాబు 'అతడు' సినిమా చేశాడు. ఆ తరువాత మళ్లీ ఇద్దరూ కలిసి ఒకే సెట్లో కనిపించలేదు.

చాలాకాలమైంది గనుక మహేశ్ - త్రివిక్రమ్ కలిసి ఓ సినిమా చేస్తారేమోనని అనుకునేలోగా, ఎన్టీఆర్ తో చేయడనికి త్రివిక్రమ్ కథను రెడీ చేసుకుంటున్నట్టుగా ఒక వార్త షికారు చేస్తోంది. 'సరిలేరు నీకెవ్వరు' సినిమాతో ఘన విజయాన్ని అందించిన అనిల్ రావిపూడితోనే తదుపరి సినిమాను చేయడానికి మహేశ్ బాబు గ్రీన్ సిగ్నల్ ఇచ్చాడని అంటున్నారు. గతంలో 'మహర్షి' వంటి సూపర్ హిట్ ఇచ్చిన వంశీ పైడిపల్లి కూడా తాజాగా వినిపించిన కథతో మహేశ్ తో ఓకే అనిపించుకున్నాడని చెబుతున్నారు. ఈ నేపథ్యంలోనే సుకుమార్ కూడా మహేశ్ బాబుకి టచ్ లోకి వెళ్లాడనే టాక్ వినిపిస్తోంది. ఇక ఇంతటితో ఈ ప్రచారాలకు తెరపడాలంటే, మహేశ్ బాబు క్లారిటీ ఇవ్వాల్సిందే.