నందమూరి హీరోల మధ్యలోనే మహేష్

అనుకున్నదంతా అయింది. ఈ ఏడాది దసరా రేస్ మాంచి రంజుగా ఉండనుందనే అంచనాలే నిజమైపోయాయి. రిలీజ్ డేట్ విషయంలో ఒక్కరు కూడా కాంప్రమైజ్ కాకపోవడంతో.. దసరాకు మూడు భారీ చిత్రాల విడుదల పక్కా అయిపోయింది. ఇప్పుడు ఈ పోటీ అఫీషియల్ గా కూడా మారిపోయింది.

మహేష్ బాబు హీరోగా మురుగదాస్ దర్శకత్వంలో రూపొందుతున్న స్పైడర్ చిత్రాన్ని సెప్టెంబర్ 27కు విడుదల చేస్తారన్నది ఇప్పటివరకూ అంచనా మాత్రమే. ఇప్పుడీ విషయం అధికారికం అయిపోయింది. సెప్టెంబర్ 27 నే స్పైడర్ రిలీజ్ చేస్తున్న మేకర్స్ చెప్పేశారు. ఇప్పటికే ఇందుకు సంబంధించిన ఫార్మాలిటీస్ ను పూర్తి చేసేందుకు పక్కా షెడ్యూల్ ఉన్నట్లు కూడా చెప్పారు. దీంతో నందమూరి హీరోలు ఇద్దరి మధ్యలోనే మహేష్ స్పైడర్ విడుదల కావడం ఖాయం అయిపోయింది. అసలు దసరా రేస్ లో మొదటగా నిలిచిన హీరో నందమూరి బాలకృష్ణ. సెప్టెంబర్ 30న పైసా వసూల్ ను విడుదల చేస్తామని ముందస్తుగానే చెప్పాడు దర్శకుడు పూరీ జగన్నాధ్.

ఎన్టీఆర్ మూవీ జై లవ కుశను సెప్టెంబర్ 21న విడుదల చేయనున్నట్లు నిర్మాత కళ్యాణ్ రామ్ చెప్పాడు. పండుగ సీజన్ కావడంతో.. రెండు సినిమాలకు స్కోప్ ఉంటుందిలే అని అంతా భావించారు. కానీ ఇప్పుడు మహేష్ కూడా ఇదే పండుగను టార్గెట్ చేసుకుని పోటీని మరింతగా పెంచేశాడు. ఎవరి సత్తా ఎంత అనే విషయం తేలడం సంగతి పక్కన పెడితే.. ఇంత తీవ్రమైన పోటీ కారణంగా.. ఆయా సినిమాలకు రావాల్సిన వసూళ్లు తగ్గుతాయని ఇండస్ట్రీ జనాలు చెబుతున్నారు.