టీజర్ టాక్: మహేష్ ప్రామిస్ చేసేశాడు

మహేష్ బాబు కొత్త సినిమా సంగతులు ఎప్పుడెప్పుడు వస్తాయా అని అభిమానులు తెగ ఆతృతగా ఎదురుచూస్తున్నారు. చెప్పినట్లుగానే.. చెప్పిన డేట్ కే.. చెప్పిన సమయానికే.. ఒక్క సెకన్ కూడా తేడా లేకుండా మహేష్ బాబు ''భరత్ అను నేను''కు సంబంధించిన విజన్.. అదేనండీ టీజర్ వచ్చేసింది. ఆన్ లైన్ హంగామా చేసేస్తోంది. ఇలా సెకన్లతో సహా కరెక్ట్ టైంకి వదలడం వెనక.. సినిమా థీమ్ కూడా ఉంది.

'ఒక మాట ఇస్తే.. ఆ మాట కచ్చితంగా నిలబెట్టుకోవాలని మా అమ్మ చెప్పింది.. ఆ మాట నిలబెట్టుకోలేకపోతే.. నువ్వు అసలు మగాడివే కాదు' అని అమ్మ చెప్పిందంటూ మహేష్ బాబు పాత్రను చూపించాడు దర్శకుడు కొరటాల శివ. అలా ఒక మాట కోసం కట్టుబడి ఎంతకైనా తెగించే వ్యక్తికి.. జీవితంలో అతి పెద్ద మాట ఇవ్వాల్సి వస్తుంది. అదే.. ముఖ్యమంత్రిగా ప్రమాణ స్వీకారం చేయడం. ఎంత కష్టమైనా సరే ఇచ్చిన మాట నిలబెట్టుకునే ముఖ్యమంత్రిగా మహేష్ బాబు కనిపించబోతున్నాడు. చివరలో భరత్ రామ్.. ముఖ్యమంత్రి అంటూ సీఎం కుర్చీలో మహేష్ బాబును చూపించారు.

సీఎం పాత్రలో నటిస్తున్నంత మాత్రాన.. మాస్ ఎలిమెంట్స్ కు ఢోకా లేదనే విషయాన్ని.. ఓ ఫైట్ సీక్వెన్స్ ను చూపించడం ద్వారా చెప్పారు. సూపర్ స్టార్ లుక్స్ అయితే.. సూపర్ స్టైలిష్ గా ఉన్నాయి. పవర్ ప్యాక్డ్ టీజర్ ఆద్యంతం ఉత్కంఠ కలిగిస్తూ సాగుతుంది. చివరలో ప్రామిస్ అంటూ మహేష్ గట్టిగా అనడం చూస్తే.. హిట్టు కొడుతున్నా ప్రామిస్ అని ఫ్యాన్స్ కి ఇన్ డైరెక్టుగా చెప్పినట్లుంది. ఇకపోతే సినిమాకు రవి.కె.చంద్రన్ మరియు తిరు అందించిన ఛాయాగ్రహణం.. అలాగే దేవిశ్రీ ప్రసాద్ మ్యూజిక్ పెద్ద ఎసెట్స్ అనే చెప్పాలి.

టీజర్ కోసం క్లిక్ చేయండి