ఎన్.టీ.ఆర్ సినిమాలో మ‌హేష్!?

తెలుగు చ‌ల‌న‌చిత్ర సీమ‌లో మొట్ట‌మొద‌టి సారిగా ‘సూప‌ర్ స్టార్‌’ బిరుదు పొందిన న‌టుడు కృష్ణ ఘ‌ట్ట‌మ‌నేని. ఆయ‌న వారసుడిగా సినిమాల్లోకి వ‌చ్చిన మ‌హేష్ కూడా తండ్రికి త‌గ్గ త‌న‌యుడిగా గుర్తింపు తెచ్చుకుని సూప‌ర్ స్టార్ గా ఎదిగాడు. ఇప్పుడు తండ్రి కృష్ణ‌గారి పాత్ర‌లోనే న‌టించేందుకు సిద్ధ‌మ‌వుతున్నాడు మ‌హేష్ బాబు. బాల‌య్య బాబు నటిస్తూ... నిర్మిస్తున్న ‘ఎన్‌.టీ.ఆర్‌’ బ‌యోపిక్ లో కృష్ణ పాత్ర‌లో న‌టించేందుకు రెఢీ అవుతున్నాడట ప్రిన్స్‌.

విశ్వ‌విఖ్యాత న‌ట సార్వ‌భౌముడిగా ఎదిగిన నంద‌మూరి తార‌క రాముడికి తెలుగు సినీ ఇండ‌స్ట్రీ మొత్తం దాసోహ‌మంది. ఆ స‌మ‌యంలో కూడా అన్న‌గారికి ఎదురెళ్లిన ఒకే ఒక్క వ్య‌క్తి కృష్ణ‌. ఆయ‌న మీద కోపంతో ‘మండ‌లాధీశుడు’ అనే సినిమాను నిర్మించాడు కృష్ణ‌. ఈ సినిమా అప్ప‌ట్లో అనేక వివాదాల‌కు కూడా కార‌ణ‌మైంది. ఇవ‌న్నీ ప‌క్క‌న పెడితే... వారిద్దరి మ‌ధ్య స్నేహం కూడా అదే రేంజ్ లో ఉండేది. ‘దేవుడు చేసిన మ‌నుషులు’ వంటి అనేక చిత్రాల్లో క‌లిసి న‌టించారిద్ద‌రూ. అందుకే ఎన్‌.టీ.ఆర్ బ‌యోపిక్ సినిమాలో కృష్ణ పాత్ర ఉండ‌డం త‌ప్ప‌నిస‌రి. దాంతో అల‌నాటి సూప‌ర్ స్టార్ పాత్ర‌ను చేయ‌మ‌ని నేటి సూప‌ర్ స్టార్ ను కోరాడ‌ట బాల‌కృష్ణ‌. తండ్రి పాత్ర‌లో క‌నిపించే అవ‌కాశం కావ‌డం... అదీ స్వ‌యంగా బాల‌య్యే అడిగేస‌రికి త‌ప్ప‌కుండా చేస్తాన‌ని మాటిచ్చాడ‌ట మ‌హేష్ బాబు.


మ‌హేష్ బాబుతో పాటు అల‌నాటి సీనియ‌ర్ హీరోల స్థానంలో నేటి హీరోల‌ను న‌టింప‌చేయాల‌ని భావిస్తున్నాడు నంద‌మూరి బాల‌కృష్ణ‌. కృష్ణంరాజు- శోభ‌న్ బాబు- ఎస్‌వీ రంగారావు వంటి పాత్ర‌ల కోసం స్టార్ న‌టుల‌నే తీసుకోవాల‌ని అనుకుంటున్నాడు. ఇప్ప‌టికే అతిలోక సుంద‌రి పాత్ర కోసం బాలీవుడ్ తార దీపికా ప‌దుకునే ను సంప్ర‌దించార‌ని స‌మాచారం. ఒకే సినిమాలో చాలామంది స్టార్లు న‌టిస్తుండ‌డంతో ఎన్‌.టీ.ఆర్ బ‌యోపిక్ సినిమాపై అంచ‌నాలు భారీగా పెరుగుతున్నాయి.