జాకీచాన్‌ తో మ‌హేష్ బాబు మూవి

చాన్.. జాకీ చాన్.. హాలీవుడ్‌ లో ద‌శాబ్ధాల చ‌రిత్ర ఉన్న స్టార్ హీరో. యాక్ష‌న్ కింగ్‌. కుంగ్ ఫూ - క‌రాటే - మార్ష‌ల్ విద్య ఏదైనా కొట్టిన పిండి. శ‌రీరంలో 216 బొమిక‌లు విరిగి అతుక్కున్న‌వే. అత‌డి విన్యాసాల‌కు హ‌ద్దే లేదు. సాహ‌సాలకు అంతూ ద‌రీ లేదు. జీవితంలో చేయాల్సిన‌వ‌న్నీ చేసేశాడు. ప్ర‌పంచ వ్యాప్తంగా వీరాభిమానుల్ని సంపాదించుకున్న అసాధార‌ణ యాక్ష‌న్ హీరో. కామెడీ - యాక్ష‌న్ జోన‌ర్‌ ని విజ‌య‌వంతంగా న‌డిపించిన స‌క్సెస్‌ ఫుల్ హీరో. అత‌డి ట్రాక్ గురించి ఎంత మాట్లాడినా త‌క్కువే.

అలాంటి స్టార్ ఓ తెలుగు సినిమాలో న‌టిస్తే ఎలా ఉంటుంది? స‌రిగ్గా ఇదే ఆలోచ‌న వ‌చ్చిన‌ట్టుంది స్టార్ డైరెక్ట‌ర్ పూరి జ‌గ‌న్నాథ్‌ కి. ప్రిన్స్ మ‌హేష్‌ తో సినిమా చేస్తున్నా అని ప‌లుమార్లు ప్ర‌క‌టించిన పూరి, ఆ సినిమాకి క‌థ కూడా రెడీ చేశాన‌ని చెప్పాడు. అందులో ఓ హాలీవుడ్ స్టార్ న‌టించ‌బోతున్నాడు. అట్నుంచి ఓకే చెప్పిన త‌ర్వాత ఆ డీటెయిల్స్ చెబుతాన‌ని అంటున్నాడు. నిన్న‌టిరోజున లోఫ‌ర్ ప్ర‌చార వేదిక సాక్షిగా అత‌డు ఈ మాట అన్నాడు. ఇంకా బోలెడ‌న్ని విశేషాలు మ‌హేష్‌ తో సినిమాలో ఉంటాయి. అయితే ప్ర‌స్తుతం ప్రిన్స్ ఇత‌ర ప్రాజెక్టుల‌తో బిజీగా ఉన్నాడు. ఆ క‌మిట్‌ మెంట్స్ అన్నీ పూర్త‌వ్వ‌గానే మా క‌ల‌యిక‌లో సినిమా సెట్స్‌ కెళుతుంద‌ని పూరీ చెప్పాడు.

ఇకపోతే తాను ఎంతో పకడ్భందీగా ప్లాన్‌ చేసిన ఈ జాకీ చాన్‌ మ్యాటర్‌ మీడియాకు లీక్‌ అవ్వడంతో షాకయ్యాడు పూరి. నేను అంత సీరియస్‌ గా ప్లాన్ చేస్తే మీకు ఎలా లీక్‌ అయ్యింది? అంటూ కొందరు మీడియా సభ్యులతో తన ఆశ్చర్యాన్ని వ్యక్తపరిచాడు.