షూటింగ్ కాసింతే పెండింగ్- మహేష్..

టాలీవుడ్ సూపర్ స్టార్ మహేష్ బాబు అండ్ టీం నార్త్ అంతా చుట్టేసి, ఇప్పుడు సౌత్ కి వచ్చేశారు. ప్రధాన సన్నివేశాల కోసం హరిద్వార్ - ఉదయపూర్ వంటి ప్రాంతాల్లో భారీ షెడ్యూల్ ను పూర్తి చేసుకుంది బ్రహ్మోత్సవం యూనిట్. ఇక్కడితో పోల్చితే వేడిగా ఉండే ప్రాంతాల్లో షూటింగ్ చేసుకుని వచ్చినా, వెంటనే ఇక్కడ కూడా షూట్ ప్రారంభించేయడం విశేషం. ఇప్పటికే హైద్రాబాద్ లో కొన్ని సన్నివేశాలను చిత్రీకరిస్తున్నారు.

హరిద్వార్ - ఉదయపూర్ లలో షూటింగ్ కు సంబంధించ కొన్ని ఫోటోలను మహేష్ స్వయంగా ట్వీట్ చేశాడు. 'హరిద్వార్ - ఉదయపూర్ లలో సుదీర్ఘమైన షెడ్యూల్ పూర్తి చేసుకుని తిరిగొచ్చేశాం. ఇంకా కొంత షూటింగ్ మాత్రమే మిగిలి ఉంది' అంటూ ట్వీట్ చేశాడు మహేష్. నార్త్ ఇండియాకి వెళ్లిన సమయంలో మహేష్-సమంతల మధ్య కొన్ని రొమాంటిక్ సీన్స్ తో పాటు.. జనసమ్మర్దంలో చిత్రీకరించే సన్నివేశాలు కూడా తెరకెక్కించారు. బ్రహ్మోత్సవంలో సమంతతో పాటు కాజల్ అగర్వాల్ - ప్రణీతలు కూడా హీరోయిన్స్ గా నటిస్తున్నారు. శ్రీకాంత్ అడ్డాల దర్శకత్వంలో తెరకెక్కుతున్న ఈ మూవీని... పీవీపీ బ్యానర్ పై నిర్మిస్తున్నారు.

మిక్కీ జే మేయర్ మ్యూజిక్ అందిస్తున్న బ్రహ్మోత్సవంను.. మే నెలలో విడుదల చేయబోతున్నారనే వార్తలు ఉన్నా.. షూటింగ్ ప్రోగ్రెస్ పై కాసిన్ని అనుమానాలు ఉన్నాయి. ఇప్పుడు ఇంకా కొన్ని సీన్స్ మాత్రమే పెండింగ్ అని మహేష్ తేల్చేయడంతో.. త్వరలోనే పోస్ట్ ప్రొడక్షన్ పనులు స్టార్ట్ కానున్నాయనే విషయం ఖాయమైంది.