మహేష్ - విజయ్ లతో సినిమాలు ప్లాన్ చేస్తున్న దర్శక ద్వయం..!

దర్శక ద్వయం రాజ్ & డీకే.. విభిన్నమైన సినిమాలు - వెబ్ సిరీస్ లతో జాతీయ స్థాయిలో క్రేజ్ సంపాదించుకున్నారు. తెలుగులో 'డీ ఫర్ దోపిడీ' సినిమాని నిర్మించిన రాజ్ నిడిమోరు - కృష్ణ డీకే.. ‘గో గోవా గాన్’ ‘స్త్రీ’ వంటి సినిమాలతో పాటు ‘ది ఫ్యామిలీ మెన్’ వెబ్‌ సిరీస్‌ తో సత్తా చాటారు. ఈ క్రమంలో ‘డీ2ఆర్ ఇండీ’ బ్యానర్‌‌ పై తొలి ప్రయత్నంగా ‘సినిమా బండి’ చిత్రాన్ని నిర్మించి సక్సెస్ అయ్యారు. ఇక వీరి నుండి రాబోతున్న ‘ది ఫ్యామిలీ మ్యాన్ 2’ కోసం అందరూ ఆసక్తిగా ఎదురుచూస్తున్నారు. అయితే రాజ్ అండ్ డీకే తెలుగులో సూపర్ స్టార్ మహేష్ బాబు - సెన్సేషనల్ స్టార్ విజయ్ దేవరకొండ లతో సినిమాలు చేయడానికి ప్రయత్నాలు చేస్తున్నట్లు తెలుస్తోంది.

ప్రస్తుతం బాలీవుడ్ స్టార్ షాహిద్ కపూర్ తో ఓ వెబ్ సిరీస్ రూపొందిస్తున్న రాజ్ & డీకే.. తెలుగు సినిమాలకు డైరెక్షన్ చేయాలని టాలీవుడ్ హీరోలతో సంప్రదింపులు జరుగుతున్నారు. ఇప్పటికే మహేష్ బాబు - విజయ్ దేవరకొండ లతో కంటెంట్ చర్చలు జరిగాయని.. త్వరలోనే ప్రాజెక్ట్ ఫైనల్ అయ్యే అవకాశాలు ఉన్నాయని రాజ్ అండ్ డీకే చెబుతున్నారు. ముందుగా ఎవరు ఒప్పుకుంటే వాళ్ళతో సినిమాను స్టార్ట్ చేయడానికి రెడీగా ఉన్నట్లు దర్శక ద్వయం తెలిపారు. ఇద్దరిలో ఎవరు గ్రీన్ సిగ్నల్ ఇచ్చినా అది తప్పకుండా పాన్ ఇండియా ప్రాజెక్ట్ కావడం ఖాయమని చెప్పవచ్చు. బాలీవుడ్ లో వరుస అవకాశాలతో దూసుకుపోతున్న తెలుగు దర్శకులు రాజ్ - డీకే.. త్వరలో టాలీవుడ్ లో కూడా సత్తా చాటుతారేమో చూడాలి. ఇకపోతే బాలీవుడ్ బాద్ షా షారుక్ ఖాన్ తో కూడా ఓ సినిమాకు చర్చలు జరుపుతున్నట్లు దర్శకులు వెల్లడించారు.