అవును.. మహేష్ బాబు గొంతిచ్చాడు

తన తండ్రి పేరెత్తితే చాలా చాలా ఉద్వేగానికి గురవుతాడు మహేష్ బాబు. మహేష్ తన కొడుకని గొప్పగా చెప్పుకునే స్థాయిలో హీరోగా మంచి పేరు సంపాదించి ఆయన రుణం బాగానే తీర్చుకున్నాడు కానీ.. నాన్న కోసం ఇంకా ఏదైనా చేయాలన్న తపన మహేష్ కు ఉంది. ఐతే సినిమాల పరంగా మహేష్ నాన్న రుణం తీర్చుకోవడానికి పెద్దగా అవకాశం లభించలేదు. మహేష్ హీరోగా బాగా నిలదొక్కుకునే సమయానికి కృష్ణ సినిమాల నుంచి తప్పుకున్నాడు. ఐతే చాలా ఏళ్ల విరామం తర్వాత కృష్ణ మళ్లీ ముఖానికి రంగేసుకుని ‘శ్రీ శ్రీ’ అనే సినిమా చేసిన సంగతి తెలిసిందే. దీంతో నాన్నకు తన వంతుగా చేయడానికి ఏదైనా చేయడానికి మహేష్ కు అవకాశం దక్కింది.

ఇప్పటికే ‘శ్రీ శ్రీ’ ఆడియో ఫంక్షన్ కు ముఖ్య అతిథిగా విచ్చేసి స్వయంగా ఆడియో విడుదల చేశాడు మహేష్. సినిమా గురించి కూడా మంచి మాటలు మాట్లాడి జనాల్లో దీని గురించి చర్చ జరిగేలా చేశాడు. ఇప్పుడిక ‘శ్రీ శ్రీ’కి ఇంకో పెద్ద సాయం చేశాడు ప్రిన్స్. ఈ సినిమాకు మహేష్ వాయిస్ ఓవర్ ఇవ్వడం విశేషం. మహేష్ ‘శ్రీ శ్రీ’కి ఇలా మాట సాయం చేయబోతున్నట్లు ఇంతకుముందే వార్తలొచ్చాయి కానీ.. అది రూమరే అనుకున్నారంతా. కానీ బుధవారం మహేష్ వచ్చి ‘శ్రీ శ్రీ’కి వాయిస్ ఓవర్ ఇచ్చిన విషయాన్ని కృష్ణ కుటుంబానికి సన్నిహితుడైన సీనియర్ పీఆర్వో బీఏ రాజు కన్ఫమ్ చేశారు. ఇది ఆ సినిమాకు పెద్ద ప్లస్ పాయింట్ అనడంలో సందేహం లేదు. కృష్ణ కొన్నేళ్ల కిందట హీరోగా చేసిన సినిమాలతో పోలిస్తే ‘శ్రీ శ్రీ’ మీద జనాల్లో ఆసక్తి, అంచనాలు బాగానే ఉన్నాయి. ఈ నెలలోనే ఈ సినిమాను ప్రేక్షకుల ముందుకు తేవాలని చూస్తున్నారు.