రేపు ఆ థియేటర్లో సూపర్ స్టార్ సందడి

సూపర్ స్టార్ మహేష్ బాబు కొత్త సినిమా 'మహర్షి' ఈ శుక్రవారమే ప్రేక్షకుల ముందుకు వచ్చింది. మిక్స్డ్ రెస్పాన్స్ వచ్చినప్పటికీ కలెక్షన్స్ డీసెంట్ గానే ఉన్నాయి. అయితే సినిమాకు భారీ ప్రీ రిలీజ్ బిజినెస్ జరగడంతో కలెక్షన్స్ లో ఊపు తెచ్చేందుకు 'మహర్షి' టీమ్ ప్రమోషన్స్ లో జోరు చూపిస్తోంది.

మహేష్ కూడా ఈ సినిమా ప్రమోషన్స్ లో పాల్గొంటూ బజ్ పెంచే ప్రయత్నాలలో ఉన్నాడు. ఈ ప్రమోషన్స్ లో భాగంగా రేపు మహేష్ బాబు ఆర్టీసీ క్రాస్ రోడ్స్ లోని సుదర్శన్ 35 ఎంఎం థియేటర్ కు వెళ్తున్నాడని సమాచారం. రేపు సాయంత్రం అంటే.. బుధవారం సాయంత్రం 6 గంటలు మహేష్ సుదర్శన్ థియేటర్ ను సందర్శిస్తారట. ఈ థియేటర్లో ఇప్పటివరకూ మహేష్ బాబు కెరీర్ లో సూపర్ హిట్స్ గా నిలిచిన చాలా సినిమాలు ప్రదర్శితమయ్యాయి. 'మురారి'.. 'ఒక్కడు'.. 'అతడు'.. 'పోకిరి'.. 'దూకుడు'.. 'సీతమ్మ వాకిట్లో సిరిమల్లె చెట్టు' లాంటి సూపర్ హిట్ సినిమాలు ఆ లిస్టులో ఉన్నాయి.

మహేష్ స్వయంగా థియేటర్ ను సందర్శిస్తే ఇక అభిమానుల సందడి ఎలా ఉంటుందో మనం ఊహించుకోవచ్చు. ఏదేమైనా రేపు సుదర్శన్ లో 6 షో టికెట్స్ ఉన్న వాళ్ళు లక్కీ అనే చెప్పాలి. స్క్రీన్ పైన సూపర్ స్టార్ ను చూడడమే కాకుండా రియల్ గా కూడా థియేటర్ లో సూపర్ స్టార్ ను చూస్తే ఆ థ్రిల్లే వేరు కదా!