దుబాయ్ లో ముగిసిన మ‌హేష్ ఛేజింగ్‌.. నెక్స్ట్ స‌ముద్ర తీరంలో!

సూప‌ర్ స్టార్ మ‌హేష్ - ద‌ర్శ‌కుడు ప‌ర‌శురామ్ కాంబోలో రాబోతున్న మూవీ ‘సర్కారు వారి పాట’. గత నెలలో దుబాయ్ లో ప్రారంభమైన ఈ మూవీ షెడ్యూల్.. ఇప్పటి వరకూ ఏకధాటిగా కొనసాగింది. ఈ షెడ్యూల్‌లో పలు కీలకమైన సన్నివేశాలతోపాటు, ఒక సాంగ్, ఇంకా కొన్ని యాక్షన్ ఛేజింగ్ ఎపిసోడ్లు షూట్ చేశారు. అనుకున్న ప్రకారం ఫిబ్రవరి 21 వరకు షెడ్యూల్ కంప్లీట్ చేసుకొని, ఇవాళే ఇండియాకు తిరుగు ప్రయాణమైంది యూనిట్.

ఇండియాకు తిరిగి వచ్చిన తర్వాత నెక్స్ట్ షెడ్యూల్ గోవాలో ప్లాన్ చేశాడు దర్శకుడు. సముద్రపు ఒడ్డున ఎలాంటి సన్నివేశాలు చిత్రీకరిస్తాడో చూడాలి. ఇందుకోసం మార్చి ఆరంభంలోనే టీం మొత్తం గోవాలో వాలిపోనుంది. ఈ షెడ్యూల్ కూడా పూర్తయిన తర్వాత అమెరికా వెళ్లనుంది యూనిట్. అక్కడ కూడా చిత్రీకరణ ముగిసిన తర్వాత ఇక, సినిమా మొత్తం హైదరాబాద్ పరిసరాల్లోనే విస్తృతంగా షూట్ చేయనున్నారు.

కాగా.. దుబాయ్ షెడ్యూల్ పూర్త‌యిన త‌ర్వాత‌.. ‘దుబాయ్ డైరీస్’ పేరుతో అక్కడి షూటింగ్ విశేషాలతో కూడిన ఓ వీడియోను రిలీజ్ చేయాలని చూస్తున్నట్టు తెలిసింది. దీనివల్ల సినిమాకు మరింత ప్రమోషన్ రాబట్టేలా ప్లాన్ చేస్తున్నారని సమాచారం. మరి, ఆ పని ఎంత వరకు వచ్చిందని తెలియాల్సి ఉంది.

భారీ బడ్జెట్‌తో రూపొందుతున్న ‘సర్కారు వారి పాట’ షూటింగ్ మొత్తం ఆగస్టు నాటికి కంప్లీట్ చేయాలని లక్ష్యంగా పెట్టుకుంది యూనిట్. ఆ తర్వాత శరవేగంగా పోస్ట్ ప్రొడక్షన్ వర్క్ ఫినిష్ చేసి, 2022 సంక్రాంతి బరిలో చిత్రాన్ని నిలపాలన్నది టార్గెట్. మైత్రి మూవీ మేకర్స్, 14 రీల్స్ తోపాటు, మహేష్ బాబు సొంత ప్రొడక్షన్ జీఎంబీ ఎంటర్టైన్మెంట్ సంయుక్తంగా ఈ చిత్రాన్ని నిర్మిస్తున్నాయి. థమన్ సంగీతం అందిస్తున్నాడు.