మహేష్-మురగ.. పొంగల్ కే పండగ

సూపర్ స్టార్ మహేష్ బాబు ప్రస్తుతం లండన్ హాలిడే టూర్ లో ఉన్నాడు. నెక్ట్స్ పిక్చర్ కి సంబంధించి ఇప్పటికే చాలా స్టోరీలు విన్న మహేష్.. మురుగదాస్ కి గ్రీన్ సిగ్నల్ ఇచ్చిన విషయం తెలిసిందే. కాస్టింగ్ సహా దాదాపు ప్రీ ప్రొడక్షన్ పనులు అన్నీ పూర్తి చేసుకున్న ఈ మూవీకి.. ఇంకా హీరోయిన్ మాత్రం ఫైనల్ కాలేదు. దర్శకుడు మురుగదాస్ దగ్గర రెండు-మూడు ఆప్షన్స్ ఉన్నాయని.. మహేష్ ఇండియాకి వచ్చాక ఎవరో ఒకరి దగ్గర ఆగుతారని అంటున్నారు. ఇప్పుడీ సినిమా షూటింగ్ ప్రారంభానికి ముహూర్తం పెట్టేసినట్లు తెలుస్తోంది.

జూలై 15 నుంచి మహేష్-మురుగ మూవీ షూటింగ్ ప్రారంభం కానుందని సమాచారం. హైద్రాబాద్ లోనే మెజారిటీ పార్ట్ షూటింగ్ జరపనుండగా.. మొదటి షెడ్యూల్ ని సుదీర్ఘంగా నిర్వహించనున్నారట. టాకీ పార్ట్ వరకూ మొదటి షెడ్యూల్ లోనే ఫినిష్ చేసేలా ప్లాన్ చేశారని అంటున్నారు. తెలుగు-తమిళ్ రెండు భాషల్లో ఈ చిత్రం రూపొందనుండడంతో.. డైలాగ్ పార్ట్ ని ఒకేసారి పిక్చరైజ్ చేయనున్నారు.

అన్నిటికీ మించిన అప్ డేట్ ఏంటంటే.. జూలైలో స్టార్ట్ చేయనున్న ఈ చిత్రాన్ని సంక్రాంతి రేస్ లో ఉంచాలని మహేష్ చెప్పినట్లుగా తెలుస్తోంది. గతేడాది బ్రహ్మోత్సవం కూడా జూలైలోనే స్టార్ట్ చేయగా.. రిలీజ్ మాత్రం పొంగల్ కి సాధ్యం కాలేదు. ఈ సారి మాత్రం షెడ్యూల్స్ పక్కాగా ఉండాలని.. సంక్రాంతి లోపు ఎట్టిపరిస్థితుల్లోనూ మూవీ ఫినిష్ అవ్వాలని చెప్పాడట సూపర్ స్టార్. అయితే.. ఇప్పటికే సంక్రాంతికి వచ్చేందుకు బాలకృష్ణ గౌతమిపుత్ర శాతకర్ణి - చిరంజీవి 150వ చిత్రం ప్రయత్నిస్తుండగా.. ఇప్పుడా రేస్ లో మహేష్ కూడా చేరడం విశేషం.