మహేష్ - జక్కన్న.. గీతా ఆర్ట్స్..?

సూపర్ స్టార్ మహేష్ బాబు - దర్శకధీరుడు రాజమౌళి కాంబినేషన్ లో ఓ సినిమా కోసం ఎప్పటి నుంచో ప్రయత్నాలు జరుగుతున్నాయి. దీనికి సంబంధించి ఇద్దరి మధ్య చర్చలు కూడా జరిగాయి. అయితే ఇన్నేళ్లకు ఈ క్రేజీ కాంబోలో ఓ భారీ ప్రాజెక్ట్ కు సన్నాహాలు జరుగుతున్నాయి.

తాత్కాలికంగా #SSMB29 పేరుతో పిలుచుకుంటున్న ఈ చిత్రాన్ని దుర్గా ఆర్ట్స్ బ్యానర్ లో కె.ఎల్‌.నారాయ‌ణ భారీ స్థాయిలో నిర్మించబోతున్నారు. ఇటు మ‌హేష్‌, అటు డైరెక్ట‌ర్ రాజ‌మౌళి ఈ విష‌యాన్ని ధృవీక‌రించారు. అయితే ఇప్పుడు ఈ ప్రాజెక్ట్ లో గీతా ఆర్ట్స్ కూడా భాగం కానుందని రూమర్స్ వినిపిస్తున్నాయి.

గీతా ఆర్ట్స్ బ్యానర్ లో రాజమౌళితో సినిమా చేయాలని ఎప్పటి నుంచో ట్రై చేస్తున్నారు. అలానే మహేష్ బాబుతో మెగా ప్రొడ్యూసర్ అల్లు అరవింద్ ఓ మూవీ ప్లాన్ చేస్తున్నట్లు ఆ మధ్య వార్తలు వచ్చాయి. అయితే ఇప్పుడు మహేష్ - జక్కన్న కాంబినేషన్లో తెరకెక్కనున్న సినిమా నిర్మాణంలో గీతా టీం కూడా భాగం పంచుకునే అవకాశం ఉందని టాక్ వినిపిస్తోంది.

ఇకపోతే మ‌హేష్ - రాజ‌మౌళి సినిమా ఒక మ‌ల్టీస్టార‌ర్ అని.. అందులో ఓ ప‌వ‌ర్‌ ఫుల్ పాత్ర కోసం సీనియ‌ర్ హీరో నంద‌మూరి బాల‌కృష్ణ‌ను సంప్ర‌దిస్తున్నార‌నే వార్త‌లు కొన్ని రోజుల క్రితం నెట్టింట జోరుగా వినిపించాయి. దీనిపై ఇటీవల దర్శకధీరుడు స్పందించారు.

RRR ప్ర‌మోష‌న్స్‌లో భాగంగా ఓ ఇంట‌ర్వ్యూలో మాట్లాడిన రాజమౌళి తన నెక్ట్స్ మూవీ మ‌ల్టీస్టార‌ర్ అని వ‌స్తోన్న వార్త‌ల్లో నిజం లేద‌ని.. మ‌హేష్ బాబు ఒక్కడే హీరో అని క్లారిటీ ఇచ్చేశారు. అంతలోనే గీతా ఆర్ట్స్ సంస్థ ఈ సినిమాలో జాయిన్ అవుతుందని మరో రూమర్ సోషల్ మీడియాలో చక్కర్లు కొడుతోంది.

#SSMB29 ను అధికారికంగా ప్రకటించే వరకు ఈ ప్రాజెక్ట్ కు సంబంధించిన ఊహాగానాలకు ఫుల్ స్టాప్ పడేలా కనిపించడం లేదు. ప్రస్తుతం మహేష్ బాబు 'సర్కారు వారి పాట' సినిమాతో పాటుగా త్రివిక్రమ్ శ్రీనివాస్ దర్శకత్వంలో SSMB28 మూవీ చేస్తున్నారు.

మరోవైపు రాజ‌మౌళి ఇప్పుడు 'ఆర్.ఆర్.ఆర్' మూవీ ప్రమోషన్స్ లో బిజీగా ఉన్నారు. ఈ సినిమా రిలీజ్ అయిన త‌ర్వాత పూర్తి స్థాయిలో మ‌హేష్ క‌థ‌పై కూర్చుంటాన‌ని దర్శకుడు రీసెంట్‌ గా చెప్పారు.

మ‌హేష్ బాబు కోసం కొన్ని పాయింట్స్‌ను అనుకున్నామ‌ని, దానిపై క‌థ‌ను వ‌ర్క‌వుట్ చేయాల‌ని జ‌క్క‌న్న క్లారిటీ ఇచ్చారు. రచయిత కేవీ విజయేంద్ర ప్రసాద్ మాత్రం ఆఫ్రికన్ ఫారెస్ట్ బ్యాక్ డ్రాప్ లో ఓ జంగిల్ బేస్డ్ అడ్వెంచర్ స్టోరీని రెడీ చేస్తున్నట్లు తెలిపారు. ఏదైనా ఈ క్రేజీ కాంబోలో వచ్చే సినిమా భారీ స్థాయిలో ఉంటుందని అర్థం అవుతోంది.