నిర్మాతగా మారుతున్న ఎన్టీఆర్ పీఆర్వో

సినీ రంగంలోకి ఏ రకంగా ప్రవేశించినా.. అంతిమంగా హీరోగానో.. దర్శకుడిగానో.. నిర్మాతగానో మారాలనుకుంటారు జనాలు. టాలీవుడ్లో పీఆర్వోలుగా ప్రవేశించిన వాళ్లు కూడా తర్వాత తమ గమ్యాన్ని మార్చుకుని.. పెద్ద స్థాయికి ఎదిగే ప్రయత్నం చేసిన వాళ్లే. ఇందుకు సీనియర్ పీఆర్వో బీఏ రాజు సరైన ఉదాహరణ. ఆయన సొంతంగా బేనర్ పెట్టి అనేక చిత్రాలు నిర్మించారు. తాజాగా ఆయన బేనర్ నుంచి ‘వైఖాఖం’ అనే సినిమా రాబోతోంది. మరో పీఆర్వో పులగం చిన్న నారాయణ.. అప్పుడప్పుడూ సినిమాలకు పాటలు రాస్తుంటాడు. మాటలూ రాస్తుంటాడు. ఇప్పుడు టాలీవుడ్లో మరో ప్రముఖ పీఆర్వో కొత్త అవతారం ఎత్తుతున్నాడు. అతనే మహేష్ కోనేరు.

జూనియర్ ఎన్టీఆర్.. నందమూరి కళ్యాణ్ రామ్ సినిమాలకు రెగ్యులర్ గా పీఆర్వోగా పని చేసే మహేష్ కోనేరు.. దీంతో పాటు ‘బాహుబలి’ సినిమాకు కూడా పీఆర్ బాధ్యతలు నిర్వర్తించాడు. ఎన్టీఆర్ కు సన్నిహితుడైన మహేష్.. ప్రొడక్షన్లోకి దిగుతున్నాడు. ‘ఈస్ట్ కోస్ట్ ప్రొడక్షన్స్’ పేరుతో కొత్తగా బేనర్ మొదలుపెడుతున్నాడు మహేష్. కొంచెం పెద్ద స్థాయిలోనే సినిమాలు నిర్మించడానికి సన్నాహాలు చేసుకుంటున్నాడట అతను. ఇండస్ట్రీలో ఉన్న పరిచయాల ద్వారా ఫైనాన్స్ విషయంలో అతడికి ఢోకా ఏమీ లేదని సమాచారం. మరి ఇతడికి ఎన్టీఆరో.. కళ్యాణ్ రామో అవకాశాలిస్తారా.. లేక వేరే హీరోల్ని ట్రై చేస్తాడో చూడాలి. త్వరలోనే మహేష్ నిర్మాతగా రాబోయే సినిమాకు సంబంధించి అధికారిక ప్రకటన రానుంది.

Like Us on Facebook : https://www.facebook.com/Tupakidotcom/