మహేష్ తొలి అడుగు 'సర్కారు వారి పాట' తోనే పడనుందా..?

టాలీవుడ్ హీరోలందరూ ఈ మధ్య ఇమేజ్ తో సంబంధం లేకుండా పాన్ ఇండియా సినిమాలు చేస్తున్నారు. ప్రెజెంట్ సౌత్ నుంచే ఎక్కువ పాన్ ఇండియా ప్రాజెక్ట్స్ వస్తున్నాయి. అయితే దేశవ్యాప్తంగా క్రేజ్ ఉండి కూడా సూపర్ స్టార్ మహేష్ బాబు మాత్రం ఇంతవరకు పాన్ ఇండియా ఫిలిం చేయలేదు. మహేష్ ఫ్యాన్స్ మాత్రం తమ అభిమాన హీరో తెలుగుతో పాటు నేషనల్ వైడ్ మాట్లాడుకునే సినిమా చేయాలని కోరుకుంటున్నారు. అయితే దర్శకధీరుడు రాజమౌళి కాంబోలో వచ్చే సినిమా ఎలాగైనా పాన్ ఇండియా ప్రాజెక్ట్ అవుతుందని నమ్ముతున్నారు. కాకపోతే ఆ లోపే ఓ అత్యున్నత స్థాయి సినిమా చేయాలని ఫ్యాన్స్ భావిస్తున్నారు.

ఈ నేపథ్యంలో మహేష్ బాబు నటించనున్న తాజా చిత్రం ''సర్కారు వారి పాట'' ను నేషనల్ వైడ్ రిలీజ్ చేస్తారని టాక్ నడుస్తోంది. అందుకు తగ్గట్టుగానే ఈ చిత్రంలో బాలీవుడ్ యాక్టర్స్ ని తీసుకోనున్నట్టు తెలుస్తోంది. అంతేకాకుండా ఈ సినిమా స్టోరీ కూడా పాన్ ఇండియా అప్పీల్ ఉండే కథాంశం అని అంటున్నారు. బ్యాంక్ స్కాముల నేపథ్యంలో అప్పులు తీసుకుని విదేశాలకు పారిపోతోన్న ఆర్థిక నేరగాళ్లను టార్గెట్ చేస్తూ ఈ సినిమా ఉంటుందట. ఇదే కనుక నిజమైతే రాజమౌళితో చేసే సినిమా కంటే ముందే మహేష్ పాన్ ఇండియాలో తొలి అడుగు 'సర్కారు వారి పాట'తో పడే అవకాశం ఉంది. అదే సమయంలో ఇది పాన్ సౌత్ ఇండియా ప్రాజెక్ట్ గా రూపొందే ఛాన్సెస్ ఉన్నాయని అంటున్నారు. ఈ చిత్రంలో మహేష్ కి జోడీగా కీర్తి సురేష్ నటించనుంది. పరశురామ్ దర్శకత్వం వహించనున్న ఈ చిత్రాన్ని మైత్రీ మూవీ మేకర్స్ - జీఎమ్బీ ఎంటర్టైన్మెంట్స్ - 14 రీల్స్ ప్లస్ బ్యానర్స్ కలిసి నిర్మించనున్నాయి.