మహేష్‌ టీమ్‌ మరోసారి ఫారిన్ ట్రిప్‌

సూపర్ స్టార్‌ మహేష్‌ బాబు నటిస్తున్న సర్కారు వారి పాట చిత్రీకరణ దాదాపుగా పూర్తి అయ్యింది. సినిమాకు సంబంధించిన చివరి దశ చిత్రీకరణ కోసం యూనిట్‌ సభ్యులు స్పెయిన్‌ వెళ్లబోతున్నారు. సినిమాకు సంబంధించిన కొన్ని కీలక సన్నివేశాలను ఇప్పటికే విదేశాల్లో చిత్రీకరణ చేయడం జరిగింది. సినిమా మొదటి షెడ్యూల్‌ ను విదేశాల్లోనే చేశారు. ఆ తర్వాత హైదరాబాద్ ఆ తర్వాత గోవాలో చిత్రీకరణ చేశారు. ఇటీవల హైదరాబాద్ షెడ్యూల్‌ ను ముగించిన చిత్ర యూనిట్‌ సభ్యులు మరోసారి విదేశీ ప్రయాణంకు సిద్దం అవుతున్నారు. యూనిట్ సభ్యులు చెబుతున్నదాని ప్రకారం వచ్చే వారంలో సర్కారు వారి పాట చిత్రీకరణ కోసం స్పెయిన్ వెళ్లబోతున్నారు. అక్కడ చిత్రీకరణ రెండు నుండి మూడు వారాల పాటు ఉంటుందని సమాచారం అందుతోంది.

స్పెయిన్‌ షెడ్యూల్‌ లో సినిమాకు సంబంధించిన కీలక సన్నివేశాలను మరియు సాంగ్స్ ను షూట్‌ చేస్తున్నట్లుగా చెబుతున్నారు. బాక్సాఫీస్ వద్ద ఈ సినిమా భారీ విజయాన్ని సొంతం చేసుకునేలా రూపొందిస్తున్నట్లుగా దర్శకుడు పరశురామ్ చెబుతున్నాడు. బ్యాంకింగ్‌ రంగంలో ఉన్న అవినీతి మరియు ఇతర అక్రమాలను గురించి ఈ సినిమాలో దర్శకుడు పరశురామ్‌ కమర్షియల్ ఎలిమెంట్స్ తో చక్కగా చూపించబోతున్నాడు. చక్కని సోషల్‌ మెసేజ్ తో పాటు ఒక మంచి ఎంటర్ టైనర్‌ గా సినిమాను రూపొందిస్తున్నట్లుగా చిత్ర యూనిట్‌ సభ్యులు చెబుతున్నారు. రికార్డు స్థాయిలో వసూళ్లు సాధించిన సరిలేరు నీకెవ్వరు సినిమా తర్వాత మహేష్ బాబు నుండి వస్తున్న సినిమా అవ్వడంతో ఈ సినిమాపై అంచనాలు ఆకాశాన్ని తాకేలా ఉన్నాయి.

మహేష్‌ బాబుకు జోడీగా ఈ సినిమాలో కీర్తి సురేష్ నటిస్తున్న విషయం తెల్సిందే. థమన్‌ సంగీతాన్ని అందిస్తున్నాడు. ఇప్పటికే సినిమాకు సంబంధించిన కీలక పాటల చిత్రీకరణ పూర్తి అయ్యిందట. మిగిలి ఉన్న పాటలను స్పెయిన్ లో పూర్తి చేస్తారట. వచ్చే నెల మూడవ వారంకు స్పెయిన్‌ షెడ్యూల్‌ ను ముగించేలా ప్లాన్‌ చేస్తున్నారు. కాస్త అటు ఇటుగా అయినా కూడా అక్టోబర్ చివరి వరకు సినిమాకు గుమ్మడి కాయ కొట్టాలని భావిస్తున్నారు. ఇప్పటికే సంక్రాంతికి సినిమాను విడుదల చేయబోతున్నట్లుగా అధికారికంగా ప్రకటన వచ్చింది. కనుక ఎలాంటి ఇబ్బంది లేకుండా నవంబర్‌ వరకు సినిమా మొదటి కాపీని రెడీ చేయాలని మేకర్స్‌ హడావుడిగా ఉన్నారు. వరుసగా మహేష్ బాబు చేస్తున్న సినిమాలతో పోల్చితే ఈ సినిమా కాస్త భిన్నంగా ఉంటుందని అంటున్నారు. మహేష్‌ బాబు మరియు త్రివిక్రమ్‌ కాంబోలో మూవీ ఇప్పటికే కన్ఫర్మ్‌ అయ్యింది. అది నవంబర్‌ నుండి పట్టాలెక్కబోతుంది. ఆ తర్వాత జక్కన్న దర్శకత్వంలో సినిమాను మహేష్‌ బాబు చేసేందుకు గ్రీన్ సిగ్నల్‌ ఇవ్వడం జరిగింది.