రైల్వేస్టేషన్ ఎపిసోడ్లో మహేశ్ ఇరగదీశాడట!

మహేశ్ బాబు తాజా చిత్రంగా ప్రేక్షకుల ముందుకు రావడానికి 'సర్కారువారి పాట' సినిమా సిద్ధమవుతోంది. లవ్ .. యాక్షన్ .. కామెడీ ప్రధానంగా సాగే ఈ సినిమాకి పరశురామ్ దర్శకత్వం వహిస్తున్నాడు. యాక్షన్ ఎపిసోడ్స్ ఈ సినిమాకి హైలైట్ గా నిలవనున్నాయి. దుబాయ్ .. గోవా .. స్పెయిన్ లలో ఈ సినిమాకి సంబంధించిన యాక్షన్ సన్నివేశాలను చిత్రీకరించారు.

కొన్ని రోజుల క్రితం హైదరాబాద్ లో ప్రత్యేకంగా వేసిన రైల్వే స్టేషన్ సెట్లో ఒక భారీ యాక్షన్ సీన్ ను చిత్రీకరించారు. ఈ సినిమా హైలైట్స్ లో ఈ సీన్ ఒకటిగా ఉంటుందని అంటున్నారు.

ఈ సీన్ తో ఈ సినిమా షూటింగు పార్టు పూర్తయిందని చెబుతున్నారు. ప్రస్తుతం ప్యాచ్ వర్క్ జరుగుతుందని అంటున్నారు. అయితే ఈ సినిమా షూటింగు పార్టు పూర్తయినట్టుగా అధికారిక ప్రకటననైతే రాలేదు. 'గీత గోవిందం' తరువాత పరశురామ్ చేస్తున్న సినిమా ఇది. అందువలన ఈ సినిమాపై భారీ అంచనాలు ఉన్నాయి. ఇక సుకుమార్ చెప్పిన కథను కాదనుకుని, పరశురామ్ కి మహేశ్ ఛాన్స్ ఇచ్చాడు. దాంతో సహజంగానే అంతగా ఈ కథలో ఏవుందనే ఆసక్తి అందరిలో పెరిగిపోతోంది.

ఈ సినిమాకి యాక్షన్ సీక్వెన్స్ హైలైట్ అని చెబుతున్నారు. కానీ సంగీతం ప్రత్యేకమైన ఆకర్షణగా నిలవనుందనే విషయం పాటలకు వస్తున్న రెస్పాన్స్ ను చూస్తుంటేనే తెలిసిపోతోంది. తమన్ స్వర పరిచిన బాణీల్లో ఇప్పటికే, ' కళావతి' .. 'పెన్నీ' పాటలు పాప్యులర్ అయ్యాయి.

రికార్డుస్థాయి వ్యూస్ ను రాబడుతూ దూసుకుపోతున్నాయి. 'ఉగాది'కి థర్డ్ సింగిల్ వదలనున్నట్టు చెబుతున్నారు. ఇక ఈ సినిమాలో మహేశ్ - వెన్నెల కిశోర్ కాంబినేషన్లో వచ్చే కామెడీ సీన్స్ కూడా ప్రేక్షకులను ఒక రేంజ్ లో నవ్విస్తాయని అంటున్నారు.

తొలిసారిగా ఈ సినిమాలో మహేశ్ బాబు సరసన కీర్తి సురేశ్ అందాల సందడి చేయనుంది. ఈ మధ్య కాలంలో కీర్తి సురేశ్ కి సరైన హిట్ పడలేదు. పూజ - రష్మిక రీసెంట్ గా ఫ్లాపుల బారిన పడటం వలన, ఇంకా వాళ్లకి దగ్గరలోనే కీర్తి ఉంది. లేదంటే వాళ్లకి ఆ ఆమె చాలా దూరంగా వెళ్లిపోయేది. అందువలన ఈ సినిమాపై ఆమె చాలా గట్టిగానే ఆశలు పెట్టుకుంది. ఈ సినిమా తప్పకుండా పెద్ద హిట్ అవుతుందనే బలమైన నమ్మకంతో ఉంది. ఆమె నమ్మకాన్ని ఈ సినిమా ఎంతవరకు నిలబెడుతుందనేది చూడాలి.