మెగా హీరోతో 'మజిలీ' మేకర్స్..?

నాగచైతన్య హీరోగా నటించిన 'మజిలీ' సినిమాతో ప్రొడక్షన్ లోకి దిగిన నిర్మాతలు హరీష్ పెద్ది - సాహు గారపాటి.. షైన్ స్క్రీన్స్ బ్యానర్ పై తొలి విజయాన్ని తమ ఖాతాలో వేసుకున్నారు. ఈ క్రమంలో అనిల్ రావిపూడి దర్శకత్వ పర్యవేక్షణ చేసిన ‘గాలి సంపత్’ చిత్రాన్ని రిలీజ్ చేశారు. ప్రస్తుతం నాని - శివ నిర్వాణ కాంబినేషన్ లో 'టక్ జగదీష్' చిత్రాన్ని నిర్మిస్తున్నారు. ఇప్పటికే అన్ని కార్యక్రమాలు పూర్తి చేసుకున్న ఈ సినిమాని త్వరలోనే ప్రేక్షకుల ముందుకు తీసుకురానున్నారు. అయితే 'టక్ జగదీష్' సినిమా త‌రువాత షైన్ స్క్రీన్స్ వారు భారీ ప్లాన్స్ వేస్తున్నారని తెలుస్తోంది.

'ఉప్పెన' సినిమాతో గ్రాండ్ ఎంట్రీ ఇచ్చిన మెగా మేనల్లుడు పంజా వైష్ణవ్ తేజ్ తో హరీష్ పెద్ది - సాహు గారపాటి ఓ సినిమా చేయనున్నారని టాక్ వినిపిస్తోంది. అలానే ఓ స్టార్ హీరోతో 'ఎక్స్ ప్రెస్ రాజా' ఫేమ్ మేర్ల‌పాక గాంధీ దర్శకత్వంలో భారీ ప్రాజెక్ట్ తెర‌కెక్కించ‌డానికి నిర్మాత‌లు స‌న్నాహాలు చేస్తున్న‌ట్లుగా స‌మాచారం. వీటికి సంబంధించిన వివ‌రాలు 'ట‌క్ జగదీష్' సినిమా రిలీజ్ త‌రువాతే బ‌య‌ట‌కు వ‌స్తాయని తెలుస్తోంది. ఇదిలావుండగా నందమూరి బాలకృష్ణ - అనిల్ రావిపూడి కాంబినేషన్ లో రానున్న సినిమా కూడా షైన్ స్క్రీన్స్ బ్యానర్ పైనే రూపొందనుందని ఫిలిం సర్కిల్స్ లో చెప్పుకుంటున్నారు.