రేపే 'మేజర్' అనౌన్స్ మెంట్..!

టాలెంటెడ్ హీరో అడివి శేష్ ప్రధాన పాత్రలో 'గూఢచారి' ఫేమ్ శశి కిరణ్ తిక్కా దర్శకత్వంలో తెరకెక్కుతున్న తాజా చిత్రం ''మేజర్''. సూపర్ స్టార్ మహేష్ బాబు (GMB ఎంటర్టైన్మెంట్) మరియు A+S మూవీస్ సహకారంతో సోనీ పిక్చర్స్ ఫిల్మ్స్ ఇండియా ఈ సినిమాని భారీ స్థాయిలో నిర్మిస్తున్నారు. చిత్రీకరణ చివరి దశకు చేరుకున్న ఈ సినిమా ప్రస్తుతం ఫైన‌ల్ షెడ్యూల్ షూటింగ్ జరుపుకుంటోంది.

26/11 ముంబై ఉగ్రవాద దాడులలో వీరమరణం పొందిన ఎన్ఎస్‌జి కమాండో మేజర్ సందీప్ ఉన్నికృష్ణన్ స్ఫూర్తిదాయకమైన జీవితం ఆధారంగా ''మేజర్'' సినిమా రూపొందుతున్న సంగతి తెలిసిందే. ఇందులో అడవి శేష్ టైటిల్ రోల్ ప్లే చేయడమే కాకుండా.. కథ - స్క్రీన్ ప్లే బాధ్యతలు కూడా నిర్వహిస్తున్నారు. ఇప్పటికే విడుదలైన ప్రచార చిత్రాలు - టీజర్ మంచి రెస్పాన్స్ తెచ్చుకున్నాయి. దీనికి తగ్గట్లుగానే ప్రీ రిలీజ్ బిజినెస్ కూడా బాగా జరిగినట్లు తెలుస్తోంది.

'మేజర్' సినిమా కోసం సినీ అభిమానులు ఎంతో ఆసక్తిగా ఎదురు చూస్తున్నారు. ఈ నేపథ్యంలో రేపు (అక్టోబర్ 3) ఉదయం 10:08 గంటలకు ఈ సినిమాకు సంబంధించిన బిగ్ అనౌన్స్ మెంట్ రాబోతోందని హీరో అడివి శేష్ సోషల్ మీడియా వేదికగా వెల్లడించారు. గత కొద్ది రోజులుగా ఎంతో మంది అడుగుతున్న ప్రశ్నకి రేపు సమాధానం దొరుకుతుంది అని శేష్ ట్వీట్ లో పేర్కొన్నారు. దీనిని బట్టి చూస్తే ఇది విడుదల తేదీ ప్రకటనే అయ్యుంటుందని అర్థం అవుతోంది.

కాగా, 'మేజర్' చిత్రాన్ని పాన్ ఇండియా స్థాయిలో పలు ప్రధాన భారతీయ భాషల్లో విడుద‌ల చేయ‌డానికి మేకర్స్ స‌న్నాహాలు చేస్తున్నారు. ఇందులో తెలుగమ్మాయి శోభితా దూళిపాళ్ల - బాలీవుడ్ బ్యూటీ సైఈ మంజ్రేకర్ కీలక పాత్రల్లో నటిస్తున్నారు. ప్రకాష్ రాజ్ - రేవతి - మురళీ శర్మ ఇతర ప్రధాన పాత్రలు పోషిస్తున్నారు. శ్రీ చరణ్ పాకాల ఈ చిత్రానికి సంగీతం సమకూరుస్తుండగా.. వంశీ పచ్చిపులుసు సినిమాటోగ్రఫీ అందిస్తున్నారు. అబ్బూరి రవి డైలాగ్స్ రాస్తున్నారు.