గేమ్ లో నెగ్గిన మేజ‌ర్.. శేష్ ల‌క్కీ ఛాయిస్!

తెలివిగా ఒక్కో మెట్టు ఎక్కుతూ ఆశ్చ‌ర్య‌ప‌రుస్తున్నాడు అడివి శేష్‌. గూఢ‌చారి చిత్రంతో తొలి క‌మ‌ర్షియ‌ల్ బ్లాక్ బ‌స్ట‌ర్ అందుకున్న శేష్ ఇప్పుడు మేజ‌ర్ తో ఈసారి ఏకంగా నాలుగు మెట్లు ఎక్కువే ఎక్కాడు. అడివి శేష్‌ ఇటీవల విడుదలైన మేజర్ తెలుగు రాష్ట్రాల్లో బాక్సాఫీస్ వద్ద మంచి వసూళ్లు సాధిస్తోంది.  గత శుక్రవారం విడుదలైన ఈ సినిమా ఏపీ- తెలంగాణ‌లో మంచి వసూళ్లను రాబడుతోంది.

నాలుగు రోజుల్లో మేజర్ రూ. ప్రపంచవ్యాప్తంగా 40.36 కోట్ల గ్రాస్ (20 కోట్ల షేర్) ని వ‌సూలు చేసింది. ఇప్పటి వరకు విడుదలైన అడివి శేష్ సినిమాల్లో ఇదే అత్యధికం. గూఢ‌చారి లైఫ్ టైమ్ లో 20కోట్ల గ్రాస్ 11 కోట్ల షేర్ వ‌సూలు చేయ‌గా ఆల్మోస్ట్ మేజ‌ర్ ఇప్ప‌టికే డ‌బుల్ షేర్ తో ఉంది. ఇప్ప‌టికీ చ‌క్క‌ని వ‌సూళ్లు సాధిస్తున్న మేజ‌ర్ 50కోట్ల క్ల‌బ్ లో అడుగుపెట్ట‌డం ఖాయ‌మ‌ని టాక్ వినిపిస్తోంది. శేష్ కెరీర్ కి మేజ‌ర్ పెద్ద ప్లస్ కానుంది.

శశి కిరణ్ తిక్క దర్శకత్వం వహించిన ఈ చిత్రంలో సాయి మంజ్రేకర్ -శోభితా ధూళిపాళ కథానాయికలుగా నటించారు. ప్రకాష్ రాజ్- రేవతి- మురళీ శర్మ తదితరులు కూడా ఈ సూపర్ హిట్ బయోగ్రాఫికల్ మూవీలో న‌టించారు. సోనీ పిక్చర్స్ ఫిల్మ్స్ ఇండియా- GMB ఎంటర్ టైన్ మెంట్- A+S మూవీస్ నిర్మించాయి. మేజర్ కి శ్రీ‌చ‌ర‌ణ్ పాకాల సంగీతం అందించారు.

గూఢ‌చారి సీక్వెల్ ఎప్పుడు?

అడివి శేష్ మేజర్ తో పాన్-ఇండియా రేంజులో స‌త్తా చాటుతున్నాడు. అత‌డికి కొత్త మార్కెట్లు తెరుచుకుంటున్నాయి. మేజ‌ర్ విజ‌యం సాధించిన క్ర‌మంలో త‌దుప‌రి గూఢ‌చారి 2ని కూడా తెర‌కెక్కించే ప్లాన్ తో ఉన్నారు. అటు బాలీవుడ్ లోనూ ఆఫ‌ర్లు వ‌చ్చాయ‌ని తెలిసింది. `హిట్ 2` లోనూ శేష్ న‌టిస్తార‌ని టాక్ ఉంది. అయితే `గూఢ‌చారి` ఫ్రాంఛైజీకి ఉన్న ఫ్యాన్ ఫాలోయింగ్ దృష్ట్యా శేష్ ఈ మూవీ సీక్వెల్ ని ఎప్పుడు ప్రారంభిస్తాడు? అన్న‌ది ఆస‌క్తిగా మారింది.