సర్కారు వారి పాటకు శ్రీమంతుడు సెంటిమెంట్‌

సూపర్‌ స్టార్‌ మహేష్‌ బాబు అతి త్వరలో పరశురామ్‌ దర్శకత్వంలో సర్కారు వారి పాట సినిమా షూటింగ్‌ లో జాయిన్‌ కాబోతున్నాడు. ఈ ఏడాది సంక్రాంతికి సరిలేరు నీకెవ్వరు సినిమాతో ప్రేక్షకుల ముందుకు వచ్చిన మహేష్‌ బాబు వెంటనే తదుపరి సినిమాను మొదలు పెట్టాలనుకున్నా కొన్ని కారణాల వల్ల ఆలస్యం అయ్యింది. ఇంతలో కరోనా వల్ల సినిమా మరింత జాప్యం జరిగింది. కరోనా సమయంలోనే పరశురామ్‌ దర్శకత్వంలో మహేష్‌ బాబు సర్కారు వారి పాట సినిమాను ప్రకటించాడు. లాక్‌ డౌన్‌ ఎత్తివేసిన వెంటనే ప్రారంభిస్తారనుకుంటే ఇప్పటి వరకు షూటింగ్‌ అప్‌ డేట్‌ లేదు. కాని ఒక్కసారి షూటింగ్‌ ప్రారంభిస్తే కేవలం నాలుగు లేదా అయిదు నెలల్లోనే పూర్తి చేసేలా జెట్‌ స్పీడ్‌ తో చిత్రీకరణ చేస్తారట. తాజాగా సర్కారు వారి పాట సినిమా విడుదల తేదీ గురించి వార్తలు వస్తున్నాయి.

సినీ వర్గాలు మరియు మీడియా సర్కిల్స్‌ నుండి అందుతున్న సమాచారం ప్రకారం సర్కారు వారి పాటను ఆగస్టు 7 2021లో విడుదల చేయాలని భావిస్తున్నారట. 2015 అదే తేదీన మహేష్‌ బాబు నటించిన 'శ్రీమంతుడు' సినిమా విడుదల అయ్యింది. మళ్లీ వచ్చే ఏడాది అతే తేదీన సర్కారు వారి పాట సినిమాను విడుదల చేయబోతున్నారు అంటున్నారు. కీర్తి సురేష్‌ హీరోయిన్‌ గా నటిస్తున్నట్లుగా ఇప్పటికే అధికారికంగా ప్రకటన వచ్చింది. ఈ సినిమా మొదటి షెడ్యూల్‌ ను అమెరికాలో చేయాలనుకున్నారు. కాని కరోనా కారణంగా షూటింగ్‌ అక్కడ నిర్వహించడం కష్టం అంటున్నారు. అందుకే మొదటి షెడ్యూల్‌ హైదరాబాద్‌ లోనే చేసే అవకాశాలున్నాయంటున్నారు.