#PSPKRana ప్రాజెక్ట్ పై క్రేజీ అప్డేట్స్..!

'అయ్యప్పనుమ్ కోషియమ్' తెలుగు రీమేక్ లో పవర్ స్టార్ పవన్ కళ్యాణ్ - రానా దగ్గుబాటి కలిసి నటిస్తున్న విషయం తెలిసిందే. ఈ చిత్రానికి సాగర్ కె.చంద్ర దర్శకత్వం వహిస్తుండగా.. త్రివిక్రమ్ శ్రీనివాస్ స్క్రీన్‌ ప్లే - డైలాగ్స్ అందిస్తున్నాడు. ఇందులో నిజాయితీ గల ఇగోయిస్ట్ పోలీస్ ఆఫీసర్ పాత్రలో పవన్ నటిస్తున్నారు. పవన్ ఇమేజ్ ని దృష్టిలో పెట్టుకొని మలయాళ కథని తెలుగు నేటివిటీకి సెన్సిబిలిటీస్ తగ్గట్లు పలు మార్పులు చేస్తున్నారు.

ముఖ్యంగా ఒరిజినల్ వెర్షన్ లో లేని స్పెషల్ ఫ్లాష్ బ్యాక్ ని జత చేస్తున్నారు. ఈ విషయాన్ని స్వయంగా చిత్ర నిర్మాత వెల్లడించారు. పవన్ లాంటి స్టార్ హీరో ఉండటంతో.. అభిమానులు మరియు కమర్షియాలిటీ కోసం స్క్రిప్ట్ లో ఇలాంటి చేంజెస్ చేస్తున్నారు. ఇటీవల వచ్చిన 'వకీల్ సాబ్' సినిమాలో కూడా పవన్ ఇమేజ్ ని దృష్టిలో పెట్టుకొని ఫ్లాష్ బ్యాక్ ఎపిసోడ్ ని యాడ్ చేశారు. హిందీ తమిళ వర్షన్స్ లో లేని ఈ ఎపిసోడ్ ప్రేక్షకులను నిరాశపరిచింది. ముఖ్యంగా పవర్ స్టార్ ఫ్యాన్స్ దీనిపై పెదవి విరిచారు.

ఈ నేపథ్యంలో ఇప్పుడు 'ఏకే' రీమేక్ లో పెడుతున్న ఫ్లాష్‌ బ్యాక్ ఎలా ఉంటుందో అని పీకే అభిమానులు చర్చించుకుంటున్నారు. త్రివిక్రమ్ - సాగర్ కలసి ఆడియన్స్ ని మెప్పించేలా ఆ ఎపిసోడ్ ని ఏ విధంగా డిజైన్ చేస్తారో చూడాలి. ఇకపోతే #PSPKRana చిత్రాన్ని రాయలసీమ బ్యాక్ డ్రాప్ లో చూపించనున్నట్లు టాక్ వినిపిస్తోంది. ఇందులో పవన్ రాయలసీమ యాసలో మాట్లాడతారట. అంతేకాదు ఓ ఫోక్ సాంగ్ కూడా పాడనున్నారని తెలుస్తోంది.

ఇప్పటికే 40 శాతానికి పైగా షూటింగ్ జరుపుకున్న ఈ సినిమాని వీలైనంత వరకు పూర్తి చేయాలని చిత్ర యూనిట్ భావిస్తోంది. ఈ చిత్రానికి థమన్ సంగీతం సమకూరుస్తున్నారు. ప్రసాద్ మూరెళ్ళ సినిమాటోగ్రఫీ అందిస్తుండగా.. నవీన్ నూలి ఎడిటర్ గా వ్యవహరిస్తున్నారు. ఏఎస్ ప్రకాష్ ఆర్ట్ డైరెక్టర్ గా వర్క్ చేస్తున్నారు. సితార ఎంటర్‌టైన్‌మెంట్స్ బ్యానర్‌ పై సూర్యదేవర నాగవంశీ ఈ చిత్రాన్ని నిర్మిస్తున్నారు.