ఆరడుగుల హీరోలు..అగ్గిపుల్ల వంటి పిల్ల!

సాధారణంగా కథను బట్టి .. పాత్రలను బట్టే హీరో హీరోయిన్ల ఎంపిక జరుగుతూ ఉంటుంది. హీరో హైట్ ను దృష్టిలో పెట్టుకునే హీరోయిన్ ను సెట్ చేస్తుంటారు. ఎందుకంటే అప్పుడే ఆ జంట తెరపై చూడముచ్చటగా ఉంటుంది .. ఆ ఇద్దరి మధ్య కెమిస్ట్రీ కుదురడానికి ప్రధానమైన కారణం అవుతుంది. హీరోకి సరిపడే హైట్ లేని కథానాయికలను పక్కన పెట్టేస్తూ, తగిన జోడీగా ఎవరు బాగుంటారా అనే వెతుకులాటను ఒక రేంజ్ లో సాగిస్తారు. కానీ సాయిపల్లవి విషయంలో ఇలాంటి పట్టింపులేవీ పనిచేయకపోవడం విశేషం.

సాయిపల్లవి హైటు తక్కువ .. నానీ, శర్వానంద్ వంటి మీడియం హైట్ హీరోల జోడీగా ఆమె బాగుంటుంది. కానీ తెలుగులో తన తొలి సినిమానే ఆమె ఆరడగుల అందగాడైన వరుణ్ తేజ్ తో చేయడం విశేషం. అయితే ఆ సినిమా కథాకథనాలు .. నేపథ్యాలు .. పాత్రలను మలిచిన తీరు కారణంగా ఎవరూ ఈ విషయాన్ని అంతగా పట్టించుకోలేదు .. ఎక్కడా అదో లోపంగా అనిపించలేదు. ఆ సినిమాకి ఇటు యూత్ తో పాటు అటు ఫ్యామిలీ ఆడియన్స్ కూడా బ్రహ్మరథం పట్టారు.

రీసెంట్ గా ఆమె రానా సినిమా అయిన 'విరాటపర్వం'లోను నటించింది. రానా హైట్ కూడా ఆరడగుల పైమాటే. ఇద్దరి పాత్రల మధ్య సంబంధం ఏమిటి? పాటలు ఉంటాయా .. పాడుకుంటారా? అనే విషయాలు తెలియదుగానీ, రానా జోడీగా ఈ అమ్మాయి సెట్ అవుతుందా? అనే సందేహం మాత్రం అభిమానులకు కలిగింది. ఒకవేళ ఈ సినిమాలో ఈ ఇద్దరూ ప్రేమికులు కారేమోనని అనుకుంటే, గోపీచంద్ జోడీగా ఈ అమ్మాయిని తీసుకున్నారనే టాక్ తాజాగా వినిపిస్తోంది.

గోపీచంద్ హీరోగా దర్శకుడు తేజ 'అలమేలుమంగ - వెంకటరమణ' అనే సినిమాను రూపొందిస్తున్నాడు. ఈ సినిమాలో నాయిక పాత్ర కోసం సాయిపల్లవిని ఎంపిక చేశారని అంటున్నారు. గోపీచంద్ మంచి హైట్ అని ప్రత్యేకంగా చెప్పవలసిన పనిలేదు. ఇలా అగ్గిపుల్లవంటి ఈ పిల్లకి ఆరడుగులున్న హీరోల పక్కనే అవకాశాలు తగులుతుండటం విశేషం. ఆమె హైటు పెద్ద సమస్య కాదనుకోవడం మరో విశేషం. అందుకు కారణం అన్ని లోపాలను కవర్ చేసే అసమానమైన ఆమె అభినయం అని చెప్పకతప్పదేమో!