'పుష్ప'లో గ్లామర్ టచ్ పెంచుతున్న మేకర్స్..!

స్టైలిష్ స్టార్ అల్లు అర్జున్ ప్రధానపాత్రధారిగా స్టార్ డైరెక్ట‌ర్ సుకుమార్ దర్శకత్వంలో రూపొందుతున్న భారీ చిత్రం పుష్ప. ప్రముఖ నిర్మాణ సంస్థ మైత్రి మూవీ మేకర్స్ నిర్మిస్తున్న ఈ మూవీ పాన్ ఇండియా లెవెల్లో తెరకెక్కుతుంది. అయితే ఈ సినిమాలో అల్లు అర్జున్ స‌ర‌స‌న నేషనల్ క్రష్ రష్మిక మంద‌న హీరోయిన్‌గా నటిస్తుంది. అయితే ఇదివరకే రిలీజ్ చేసినటువంటి పుష్ప పోస్టర్స్ - టీజర్ ప్రేక్ష‌కుల‌ను విప‌రీతంగా ఆక‌ట్టుకున్నాయి. ఊరమాస్‌ రఫ్ లుక్కులో అల్లు అర్జున్ ఫ్యాన్స్ అందరికి ట్రీట్ ఇచ్చాడు. పాన్‌ ఇండియా మూవీగా పుష్ప తెలుగు - తమిళ - హిందీ - కన్నడ - మలయాళం భాషల్లో విడుదల కాబోతుంది.

అయితే ప్రస్తుతానికి ఆగష్టు 13న పుష్పను రిలీజ్ చేయనున్నట్లు డేట్ అయితే ఫిక్స్ అయ్యుంది. కానీ కరోనా కారణంగా సినిమా వాయిదాపడింది. అడవుల్లో జరిగే ఎర్రచందనం స్మగ్లింగ్ నేపథ్యంలో సాగే ఈ మూవీలో బ‌న్నీ లారీడ్రైవరుగా కనిపించనున్నాడు. అయితే క‌థ‌, క‌థనం గురించి ప‌క్క‌న పెడితే ఈ సినిమా రెండు భాగాలుగా రెడీ అవుతోంది. తాజాగా ఈ సినిమా రెండు భాగాలుగా విడుదల కాబోతుందని చెప్పేసరికి ఫ్యాన్స్ ఖుషీ అయిపోతున్నారు. అలాగే ఈ సినిమాలోని పలు క్యారెక్టర్స్ పై సోషల్ మీడియాలో పలు వార్తలు వైరల్ అవుతున్నాయి. అందులో ఒకటి యాంకర్ అనసూయ పాత్ర.

టాలీవుడ్ గ్లామరస్ యాంకర్స్ లో ఒకరైన అనసూయ.. కొంతకాలంగా సినిమాల్లోనే ఎక్కువగా దర్శనమిస్తుంది. క్షణం సినిమా నుండి అనసూయ యాక్టింగ్ వైపు పూర్తిగా ఫోకస్ పెట్టింది. అనంతరం సుకుమార్ దర్శకత్వంలో రంగస్థలం సినిమా చేసింది. ఆ సినిమాలో అనసూయ నటనకు గాను అవార్డు కూడా అందుకుంది. అయితే అనసూయ గ్లామర్ టచ్ పుష్పలో కూడా చూపించబోతున్నారు మేకర్స్. రంగస్థలం లాగే పుష్పలో కూడా అనసూయ కోసం ఓ స్పెషల్ క్యారెక్టర్ రాసుకున్నారట. అయితే ఇదివరకు ఆమె పాత్ర కొద్దిసేపు మాత్రమే ఉంటుందని వార్తలు వచ్చాయి. కానీ ఇప్పుడు రెండు భాగాలు కాబట్టి ఆమె క్యారెక్టర్ కూడా డెవలప్ చేసి నిడివి పెంచుతున్నట్లు సమాచారం. పుష్పతో పాటు మరోవైపు అనసూయ రంగమార్తాండా - ఖిలాడి సినిమాల్లో కూడా కీలకపాత్రలు పోషిస్తోంది.