మందారంలాంటి పిల్ల .. మాళవిక శర్మ!

టాలీవుడ్ తెరపై సందడి చేసే హీరోయిన్లలో చాలామంది ముంబై నుంచి దిగినవారే. అలా ముంబై ఫ్లైట్ దిగిన ముద్దుగుమ్మల్లో మాళవిక శర్మ ఒకరుగా కనిపిస్తుంది. రవితేజ హీరోగా చేసిన 'నేల టిక్కెట్టు' సినిమా ద్వారా ఈ పిల్ల తెలుగు తెరకి పరిచయమైంది. ఈ సినిమాలో రవితేజ జోడీగా ఈ అమ్మాయి సెట్ కాలేదు. చిన్నపిల్లగా అనిపించడంతో, హీరోయిన్ గా ప్రేక్షకులు అంగీకరించలేకపోయారు. తొందరపడి ఒక కోయిల ముందే కూసింది అన్నట్టుగా, తొలి సినిమాలోనే రాంగ్ స్టెప్ వేసింది. వ్రతం చెడినా ఫలితం దక్కకుండానూ పోయింది.

రెండవ సినిమాకి ఈ అమ్మాయి కాస్త తెలివి తెచ్చుకుని రామ్ జోడిగా 'రెడ్' చేసింది. జోడీ బాగుంది కానీ .. కథే కనెక్ట్ కాలేదు .. సక్సెస్ తిరిగి చూడలేదు. కాకపోతే యూత్ దృష్టిని మాత్రం తనవైపుకు తిప్పుకోవడంలో సక్సెస్ అయింది. అల్లరి కళ్లు .. అందమైన పలువరుస .. చిలిపి చూపులు .. చిక్కనైన నవ్వులు .. అరక్షణంలోనే ఆమె అభిమానులుగా మార్చేస్తాయి. పనసపండులో నుంచి పుట్టుకొచ్చిందా? బంగారు గనుల్లో నుంచి నడిచొచ్చిందా? అన్నట్టుగా కనిపించే ఈ పిల్లతో, కలలో కబుర్లు చెప్పినా చాలనుకునేవారు చాలామందినే ఉన్నారు.

ఒక కథనాయికకు ఉండవలసిన లక్షణాలు ఈ అమ్మాయికి పుష్కలంగా ఉన్నాయి. ఇప్పుడిప్పుడే అడుగులు నేర్చుకుంటుంది గనుక, పరుగులు తీయడానికి సమయం ఉంది. అందుకనేనేమో ఈ అమ్మాయి సోషల్ మీడియాలో చాలా యాక్టివ్ గా ఉంటోంది. హాట్ హాట్ ఫొటోలను కూల్ గా వదులుతోంది. అమ్మాయి చూస్తే అగ్గిపెట్టెలా కనిపిస్తోందిగానీ, అబ్బాయిల గుండెలను అగ్నిపర్వతాలనే చేస్తోంది. మాళవిక ఎంట్రీ ఇచ్చిన దగ్గర నుంచి తమకి కునుకూ లేదు .. కుదురులేదు అంటున్నారు కుర్రాళ్లు.

మాళవిక చేసింది రెండు సినిమాలే అయినా, యూత్ లో ఆమెకి మంచి ఫాలోయింగ్ ఉంది. నితిన్ .. నిఖిల్ వంటి హీరోల జోడీగా ఆమెను చూడాలని అభిమానులు భావిస్తున్నారు. ఇక కొత్త హీరోల జోడీగా కూడా ఆమె బాగుంటుందనే అభిప్రాయాలను వ్యక్తం చేస్తున్నారు. టాలీవుడ్ లో ఆమె జోరు కొనసాగడం ఖాయమనే నమ్మకాన్ని వ్యక్తం చేస్తున్నారు. అభిమానుల్లో ఉత్సాహమైతే బాగానే ఉంది .. మరి అమ్మడి హాటు ఫొటోల ప్రయోగాలు ఫలించి, అమాంతంగా అవకాశాలు పెరుగుతాయా అనేది చూడాలి.