దేవ్‌ విషయంలో దిల్‌ రాజునే ఒప్పించాడు ప్రేక్షకులను గుణశేఖర్‌ ఒప్పించలేడా?

గుణశేఖర్‌ దర్శకత్వంలో వచ్చిన రుద్రమదేవి విడుదల అయ్యి దాదాపు ఆరు సంవత్సరాలు అవుతుంది. అప్పటి నుండి గుణశేఖర్ తదుపరి సినిమా గురించి ప్రేక్షకులు ఎదురు చూస్తున్నారు. ఎట్టకేలకు గుణశేఖర్‌ తదుపరి సినిమా శాకుంతలం ను మొదలు పెట్టాడు. తాజాగా పూజా కార్యక్రమాలు మొదలు పెట్టిన ఈ సినిమా రెగ్యులర్ షూటింగ్‌ ను మరో వారం పది రోజుల్లోనే ప్రారంభించేందుకు ఏర్పాట్లు చేస్తున్నట్లుగా పేర్కొన్నారు.

శకుంతల దుష్యంతుడి ప్రణయ గాథ తో ఈ సినిమా రూపొందుతున్న విషయం తెల్సిందే. శకుంతలగా సమంత కనిపించబోతుంటే దుష్యంతుడి పాత్రకు గాను మలయాళ కొత్త నటుడు దేవ్‌ మోహన్‌ ను ఎంపిక చేశారు. ఇంత భారీ సినిమా అంత పెద్ద స్టార్‌ హీరోయిన్‌ సినిమా లో ముక్కు మొహం తెలియని దేవ్ ను ఎంపిక చేయడం ఏంటీ అంటూ గుణశేఖర్‌ పై విమర్శలు వస్తున్నాయి. ఇలాంటి సమయంలో దిల్ రాజు చేసిన వ్యాఖ్యలు జనాలను కాస్త కూల్ చేసినట్లుగా ఉన్నాయి.

శాకుంతలం సినిమా నిర్మాణంలో గుణశేఖర్‌ తో పాటు దిల్ రాజు కూడా భాగస్వామి అవుతున్నారు. కథ విన్న తర్వాత తప్పకుండా ఇదో అద్బుత దృశ్య కావ్యంగా నిలుస్తుందనే ఉద్దేశ్యంతో తాను భాగస్వామ్యం అయ్యేందుకు ముందుకు వచ్చానంటూ దిల్ రాజు చెప్పుకొచ్చాడు. శకుంతలగా సమంత ఓకే కాని దుష్యంతుడి పాత్రకు మరెవ్వరైనా అయితే బాగుండేది కదా అని తాను గుణశేఖర్‌ గారి వద్ద ప్రస్థావించిన సమయంలో అప్పటికే తీసిన ఫొటో షూట్ కొన్ని వీడియోలను చూపించారు. వాటిని చూసి దుష్యంతుడి పాత్రకు ఖచ్చితంగా అతడు న్యాయం చేస్తాడని తప్పకుండా ప్రేక్షకులు కూడా దుష్యంతుడిగా దేవ్ ను అంగీకరిస్తారని అభిప్రాయం వ్యక్తం చేశారు.

దుష్యంతుడి పాత్రకు దేవ్‌ ను ఎంపిక చేసి హీరోయిన్‌ సమంత మరియు మోస్ట్‌ బిజినెస్‌ మైండెడ్‌ అయిన దిల్‌ రాజును ఒప్పించిన గుణశేఖర్ ఖచ్చితంగా ప్రేక్షకులను కూడా ఒప్పిస్తాడనే నమ్మకం వ్యక్తం అవుతోంది. సినిమాలో దుష్యంతుడి పాత్రకు కొత్త ఫ్రెష్‌ ఫేస్ అయితేనే బాగుంటుందనే అభిప్రాయంతో గుణశేఖర్‌ ఈ నిర్ణయాన్ని తీసుకున్నట్లుగా చెబుతున్నారు.