వావ్.. వైఎస్సార్‌ గా మమ్మట్టి లుక్

మహానేతగా తెలుగు ప్రజల హృదయాల్లో చెరగని ముద్ర వేసిన దివంగత ముఖ్యమంత్రి.. వైఎస్ రాజశేఖర్ రెడ్డి జీవితంలో ముఖ్య ఘట్టాల ఆధారంగా ‘యాత్ర’ అనే సినిమాను అనౌన్స్ చేసిన సంగతి తెలిసిందే. ఇది సగటు పొలిటికల్ సినిమాలా ఉండబోదని.. దీన్ని ఎంతో ప్రత్యేకంగా తీర్చిదిద్దబోతున్నారని.. నిన్న రిలీజైన టైటిల్ లోగో చూసినపుడే అర్థమైంది. టైటిల్ లోగోను అద్భుతంగా తీర్చిదిద్దిన చిత్ర బృందం.. ఇప్పుడు ఫస్ట్ లుక్ పోస్టర్ తో పలకరించింది. ఈ చిత్రంలో మమ్ముట్టి వైఎస్సార్ పాత్రను పోషిస్తున్న విషయాన్ని ధ్రువీకరిస్తూ.. ఫస్ట్ లుక్ కూడా లాంచ్ చేశారు. వైఎస్ మార్కు పంచెకట్టుతో.. ఆయన శైలికి తగ్గ అభివాదంతో అదరగొట్టేశాడు మమ్ముట్టి.

ఈ లుక్ చూస్తే జనాలకు వైఎస్సే గుర్తుకొస్తాడనంలో సందేహం లేదు. మమ్ముట్టిని వైఎస్ పాత్రకు ఎంచుకోవడం సరైన ఛాయిస్ అనిపిస్తుంది. ‘ఆనందో బ్రహ్మ’తో మెప్పించిన యువ దర్శకుడు మహి.వి.రాఘవ్ ‘యాత్ర’కు దర్శకత్వం వహించబోతున్నాడు. వైఎస్ ముఖ్యమంత్రి కావడానికి ప్రధాన కారణమైన పాదయాత్ర మీద ప్రధానంగా ఫోకస్ చేస్తూ ఆయన రాజకీయ ప్రస్థానాన్ని కూడా చూపించబోతున్నారీ సినిమాలో. వైఎస్ పాత్రలో మరో నటుడు కనిపించి ఉంటే ఈ చిత్రం జనాల్లో అంత ఆసక్తి రేకెత్తించి ఉండేది కాదేమో. అంత సీరియస్ గా తీసుకునేవాళ్లు కాదేమో. కానీ మమ్ముట్టి లాంటి దిగ్గజ నటుడు ఆ పాత్ర చేస్తుండటంతో అందరిలోనూ ఆసక్తి నెలకొంది. సినిమాపై అంచనాలు పెరిగాయి. మరి ఆ అంచనాల్ని ‘యాత్ర’ ఏమేరకు అందుకుంటుందో చూడాలి.