ట్రాన్స్ జెండర్ తో సూపర్ స్టార్ రొమాన్స్

నిజంగానే సాహసమని చెప్పాలి. మన అగ్ర కథనాయకులంతా విలక్షణమైన కథల్ని ఎంచుకోవటానికే కిందామీదా పడిపోతుంటారు. అదేమంటే ఫ్యాన్స్ ను నొప్పించకూడదని.. వారికి నచ్చకపోతే ఇంకేమైనా ఉంటుందని బోలెడన్ని మాటలు చెబుతుంటారు. అదే టైంలో మంచి సినిమాల గురించివారు చెప్పే కబుర్లు అన్నిఇన్ని కావు. అయితే..ఇలాంటి మాటలు చెప్పకుండా ఓన్లీ చేతల్లో మాత్రమే చూపించే అగ్రనటులు కొందరు ఉంటారు. వారు ఇమేజ్ చట్రాన్నిఅస్సలు ప్రస్తావించరు.

అలాంటి నటుల్లో మలయాళ సూపర్ స్టార్ మమ్ముట్టి ఒకరు. సినిమాలో ఆయన పాత్ర కనిపిస్తుందే తప్ప.. మమ్ముట్టి కనిపించని వైనం తెలిసిందే. తాజాగా ఆయన తీసుకున్న నిర్ణయం ఒక సంచలనంగా మారింది. ఒక ట్రాన్స్ జెండర్ తో రొమాన్స్ చేసేందుకు ఓకే చెప్పేశారు. ఒక అగ్రనటుడు ఇంత సాహసోపేతమైన నిర్ణయం ఇండియన్ ఫిలిం ఇండస్ట్రీ హిస్టరీలోనే లేదని చెప్పాలి.

తన తాజా చిత్రంలో అంజలి అమిర్ అనే యువ నటితో ఆయన జతకట్టనున్నారు. ఇక్కడ అంజలి అమిర్ గురించి కాస్త చెప్పాలి. మోడల్ గా సుపరిచితమైన ఆమె.. పుట్టింది అబ్బాయిగానే. అయితే.. అమ్మాయి అవ్వాలన్న బలమైన కాంక్షతో ఇంటి నుంచి వచ్చేసి ట్రాన్స్ జెండర్ గా మారిపోయి.. అమ్మాయిగా మారింది.

ఆమె నిర్ణయాన్ని తల్లిదండ్రులు.. బంధుమిత్రులంతా వ్యతిరేకించినా.. ఆమె అస్సలు ఫీల్ కాలేదు. ట్రాన్స్ జెండర్ గా మారిన తర్వాత మోడలింగ్  చేసిన ఆమెకు గతంలో సినిమా.. టీవీ సీరియల్స్ లో అవకాశాలు వచ్చినా.. ఆమె గురించిన అసలువిషయం తెలిసి వెనక్కి వెళ్లిపోయాయి. ఇలాంటి వేళ.. ఆమె కల నిజమై.. ఏకంగా సూపర్ స్టార్ మమ్ముట్టి చిత్రంలో ఆయనకు జతగా నటించే అద్భుతమైన అవకాశాన్ని చేజిక్కించుకున్నారు. ఇప్పుడీ వార్త.. ఇండస్ట్రీలో హాట్ టాపిక్ గా మారింది.

Like Us on Facebook : https://www.facebook.com/Tupakidotcom/