మనస్సుకు నచ్చింది.. అక్కడ ఎక్కిందా?

ఇప్పుడు చాలా సినిమాలు ప్రమోషన్లు లేకపోవడంతో ఫెయిల్ అవుతున్నాయి. ఒక మంచి ఫీల్ గుడ్ సినిమా జనాలకు తెలియాలంటే భారీ ప్రమోషన్లు ఉండాల్సిందే. అలా తెలియని పక్షంలో ఆ సినిమా ఎంత బాగున్నా ఎన్నేసి స్టార్లు వచ్చినా కూడా.. జనాలు వచ్చేలోపు ధియేటర్ల నుండి ఎగిరిపోయే ప్రమాదముంది. అమెరికాలో అయితే ఈ తంతు మరీ ఫాస్టుగా ఉంటుంది. అందుకే ఈరోజుల్లో ఓవర్సీస్ లో చాలామంది కాస్త గట్టిగా ప్రమోషన్లను చేస్తున్నారు.

ఇప్పుడు మ్యాటర్ ఏంటంటే.. మనస్సుకు నచ్చింది సినిమా రేపే రిలీజ్ కానుంది. అయితే ఈ సినిమాకు ఎంత ప్రయత్నించినా కూడా అనుకున్నంత బజ్ రాకపోవడంతో ఇప్పుడు ఏకంగా మహేష్‌ బాబునే రంగంలోకి దింపింది దర్శకురాలు మంజుల. అక్క కోసం తమ్ముడు తెగ కష్టపడుతున్న సంగతి తెలిసిందే. అయితే ఈ సినిమా గురించి అసలు అమెరికాలో ఎక్కిందా అంటే.. ఎక్కలేదేనే చెప్పాలి. అక్కడ అసలు సినిమా వస్తున్నట్లు బజ్ అనేదే లేదు. నిజానికి మహేష్‌ బాబు అంటేనే ఓవర్సీస్ కింగ్. అలాంటప్పుడు మొదటి నుండి ఈ సినిమాను మనోడితో అక్కడ ప్రమోట్ చేయించకుండా.. హీరో సందీప్ కిషన్ ను అమెరికా పంపించి ప్రమోట్ చేయడం వలన పెద్దగా పాజిటివ్ బజ్ రాలేదని అంటున్నారు సినిమా విశ్లేషకులు.

ఏదేమైనా కూడా.. మంజుల తన తొలి సినిమాతో తమ్ముడి అశేష అభిమానగణాన్ని ఆకట్టుకుంటే పర్లేదు కాని.. లేకపోతే మాత్రం కష్టమే. ఇక ఓవర్సీస్ లో అయితే పూర్ ప్రమోషన్ల దృష్ట్యా కేవలం మంచి టాక్ వస్తే తప్పించి సినిమా జనాలకు ఎక్కే సీన్ కనిపించట్లేదు. చూద్దాం ఏమవుతుందో. సందీప్.. అమైరా దస్తూర్.. త్రిధా చౌదరి ప్రధాన పాత్రల్లో నటించిన ఈ సినిమా ఫిబ్రవరి 16న విడుదలవుతోంది.