సినిమా పబ్లిసిటీలో మారుతి రూటే సెపరేటు..!

ఎంటర్టైన్మెంట్ చిత్రాల స్పెషలిస్ట్ దర్శకుడు మారుతి యూత్ తో పాటుగా ఫ్యామిలీ ఆడియన్స్ ని ఆకట్టుకున్నారు. 'ఈ రోజుల్లో' 'బస్ స్టాప్' 'ప్రేమ కథా చిత్రమ్' 'భలే భలే మగాడివోయ్' 'మహానుభావుడు' 'ప్రతిరోజూ పండగే' వంటి సినిమాలతో సూపర్ సక్సెస్ అందుకున్నారు. ప్రస్తుతం మ్యాచో స్టార్ గోపీచంద్ తో 'పక్కా కమర్షియల్'.. సంతోష్ శోభన్ తో 'మంచి రోజులు వచ్చాయి' సినిమాలు రూపొందిస్తున్నారు. అయితే మొదటి నుంచి కూడా సినిమాని పబ్లిసిటీ చేయడంతో మారుతి శైలి భిన్నమనే చెప్పాలి.

మారుతి అప్పట్లో 5డీ కెమెరా తో తీసిన 'ఈరోజుల్లో' చిత్రాన్ని జానాల్లోకి తీసుకెళ్లడానికి వినూత్నమైన పద్ధతులు ఫాలో అయ్యారు. పోస్టర్స్ - టీజర్స్ అన్నీ యూత్ ని ఆకర్షించేలా సరికొత్తగా ప్లాన్ చేశారు. ఆ తర్వాత వచ్చిన చిత్రాలకు కూడా సినిమా కంటెంట్ ని బట్టి కొత్తగా పబ్లిసిటీ చేస్తూ వస్తున్నారు. కోర్టులో వాదిస్తున్నట్లు 'పక్కా కమర్షియల్' మూవీ అనౌన్స్ మెంట్.. సినిమా డిటైల్స్ ఏమీ లేకుండా రిలీజ్ డేట్ కోసం కుర్చీ మీద కర్చీఫ్ వేయడం వంటివి ఎంతగా వర్కవుట్ అయ్యాయో ప్రత్యేకంగా చెప్పక్కర్లేదు. ఇప్పుడు 'మంచి రోజులు వచ్చాయి' సినిమా ప్రమోషన్స్ విషయంలోనూ కొత్త స్ట్రాటజీ ఫాలో అవుతున్నారు.

'ఏక్ మినీ కథ' ఫేమ్ సంతోష్ శోభన్ - 'ఎఫ్ 2' బ్యూటీ మెహ్రీన్ కౌర్ ఫిర్జాదా హీరోహీరోయిన్లుగా మారుతి తెరకెక్కిస్తున్న తాజా చిత్రం ''మంచి రోజులు వచ్చాయి''. వాస్తవ సంఘటన ఆధారంగా ఈ రొమాంటిక్ కామెడీ ఎంటర్టైనర్ రూపొందుతోంది. ఈ సినిమా అన్ని కార్యక్రమాలు పూర్తి చేసుకొని విడుదలకు సిద్ధంగా ఉంది. ఇప్పటి వరకు విడుదలైన ప్రచార చిత్రాలు - పాటలు మంచి స్పందన తెచ్చుకున్నాయి. ఇప్పుడు పరిస్థితులు సానుకూలంగా ఉండటంతో ఈ చిత్రాన్ని విడుదల చేయడానికి మేకర్స్ సన్నాహాలు చేస్తున్నారు.

ఈ నేపథ్యంలో ''మంచి రోజులు వచ్చాయి'' సినిమాలో కీలక పాత్ర పోషించిన అజ‌య్ ఘోష్‌ ఆడియో లీక్ అంటూ 'M tv'(మారుతి టీవీ) ద్వారా రిలీజ్ డేట్ అనౌన్స్ మెంట్ ఇచ్చారు. అజ‌య్ ఘోష్‌ కు అప్ప‌డాల విజ‌య‌ల‌క్ష్మి అనే మ‌హిళ ఫోన్ చేయడం.. మారుతి డైరెక్ట్ చేసిన ‘మంచి రోజులు వ‌చ్చాయి’ సినిమా న‌వంబ‌ర్ 4న విడుద‌ల చేయ‌బోతున్నార‌ని తెలిసిందని.. త‌న‌ను కూడా సినిమాకు తీసుకెళ్లాలంటూ డిమాండ్ చేయడం.. ఇలా ఇద్దరి మధ్య సంభాషణతో వచ్చిన ఆడియో వైరల్ అవుతోంది. డైరెక్ట‌ర్ మారుతి సినిమా ప్ర‌మోష‌న్స్‌లో భాగంగా ఇలా ఆడియో లీక్డ్ అంటూ దీపావళి సందర్భంగా వచ్చే నెల 4న తమ సినిమా వస్తోందని వెల్లడించారు.

కాగా, 'మంచి రోజులు వచ్చాయి' చిత్రాన్ని యూవీ కాన్సెప్ట్స్ మరియు మాస్ మూవీ మేకర్స్ సంస్థలు సంయుక్తంగా నిర్మిస్తున్నాయి. వి సెల్యులాయిడ్ మరియు SKN దీనికి నిర్మాతలు. అనూప్ రూబెన్స్ ఈ చిత్రానికి సంగీతం సమకూర్చారు. సాయి శ్రీరామ్ సినిమాటోగ్రఫీ అందించగా.. రామ్ కుమార్ ఆర్ట్ డైరెక్టర్ గా వర్క్ చేశారు. ఇందులో అజయ్ ఘోష్ - వెన్నెల కిషోర్ - శ్రీనివాస్ రెడ్డి - ప్రవీణ్ - సప్తగిరి - సుదర్శన్ - వైవా హర్ష - సత్యం రాజేష్ - శ్రీకాంత్ అయ్యంగార్ తదితరులు పాత్రలు పోషించారు. మారుతి గత చిత్రాల తరహాలోనే ఈ సినిమా ఉండబోతోంది. డిఫరెంట్ ప్రమోషనల్ స్ట్రాటజీ తో సినిమాని జనాల్లోకి తీసుకెళ్తున్న సక్సెస్ ఫుల్ డైరెక్టర్ కు 'మంచి రోజులు వచ్చాయి' మంచి విజయాన్ని అందిస్తుందేమో చూడాలి.