మరోసారి మంచిమనసు చాటుకున్న మంచు హీరో

మంచు మనోజ్‌ ఎప్పటికప్పుడు తన మంచి మనసును చాటుకుంటూనే ఉంటాడు. తుఫాన్‌ ల సమయంలోనే కాకుండా పలు విపత్కర పరిస్థితుల్లో సామాన్యులకు సాయం చేసేందుకు స్వయంగా రంగంలోకి దిగిన సందర్బాలు చాలా ఉన్నాయి. చెన్నై.. వైజాగ్‌ లతో పాటు పలు చోట్ల పకృతి విపత్తులు సంభవించిన సమయంలో తన వంతు సాయంను ప్రకటించడంతో పాటు ఆ సమయంలో తన టీంతో ఫీల్డ్‌ లోకి దిగి మరీ సాయం అందించిన ఘనత ఆయనకే దక్కుతుంది.

టాలీవుడ్‌ నుండి ఇప్పటి వరకు పలువురు హీరోలు కరోనా నుండి దూరంగా ఉండేందుకు తీసుకోవాల్సిన జాగ్రత్తలు.. పాటించాల్సిన జాగ్రత్తలను మాత్రమే చెప్పారు. కాని మంచు మనోజ్‌ మాత్రం ఏకంగా ఎవరైతే మాస్క్‌ లు మరియు శానిటైజర్స్‌ ను కొనుగోలు చేయలేక వాడటం లేదో వారికి వాటిని సప్లై చేయబోతున్నట్లుగా సోషల్‌ మీడియా ద్వారా ప్రకటించాడు.

ప్రతి ఒక్కరు కూడా ఆరోగ్యంగా ఉండాలనే ఉద్దేశ్యంతో మంచు మనోజ్‌ చేస్తున్న ఈ పనిని ఆయన అభిమానులు మరియు సామాన్యులు అభినందిస్తున్నారు. ఇలాంటి మంచి పనులు మళ్లీ మళ్లీ చేయాలంటూ మంచు ఫ్యాన్స్‌ కోరుకుంటున్నారు. మంచి మనసుతో సామాన్యుల ఆరోగ్యం విషయంలో దృష్టి పెట్టిన మంచు మనోజ్‌ నిజంగా అభినందనీయుడు.