మంచు సినిమాలో బాలీవుడ్ హీరో

మంచు హీరోలు మంచి హిట్టు కొట్టి చాలా కాల‌మే అయ్యింది. విష్ణు.. మ‌నోజ్ కెరీర్ డైల‌మా గురించి చ‌ర్చ సాగుతోంది. అయితే క‌లెక్ష‌న్ కింగ్ మోహ‌న్ బాబు ఇటీవ‌ల పంథా మార్చి క్రేజీ డైరెక్ట‌ర్ల వైపు చూస్తున్నారు. సోలో హీరోగా కాకున్నా.. పాత్ర బాగుండి.. పారితోషికం బాగా ఇస్తే కీల‌క పాత్ర అయినా స‌రే అంటూ త‌న పంథా మార్చుకున్నారు. మ‌ణిర‌త్నం ద‌ర్శ‌క‌త్వంలో మ‌ల్టీస్టార‌ర్ స‌హా సూర్య‌తో వేరొక సినిమాలో మోహ‌న్ బాబు చేస్తున్నారు. అలాగే మంచు విష్ణు ఈ ద‌ఫా ఎలాగైనా హిట్ కొట్టాల్సిందే అంటూ ప్ర‌య‌త్నాలు సాగిస్తూనే ఉన్నారు. మంచు మ‌నోజ్ సినిమాల‌కు కొంత విరామం తీసుకుని రీఎంట్రీ సినిమాకి ప్లాన్ చేస్తున్నార‌ని తెలుస్తోంది. ఆస‌క్తిక‌రంగా ఆ ముగ్గురు హీరోలు ఒకేసారి రీఎంట్రీలతో దుమారం రేపుతుండ‌డం హాట్ టాపిక్ గా మారింది.

`కాల్ సెంట‌ర్‌` పేరుతో రూపొందుతున్నఓ ఇంగ్లీష్ చిత్రంలో మంచు విష్ణు న‌టిస్తున్న విష‌యం తెలిసిందే. కాజ‌ల్ అగ‌ర్వాల్ ఈ చిత్రంలో అత‌నికి సోద‌రికిగా క‌నిపించ‌బోతోంది. రుహానీ సింగ్ క‌థానాయిక‌గా న‌టిస్తున్న ఈ చిత్రాన్ని హాలీవుడ్ డైరెక్ట‌ర్ జెఫ్రీ చైన్ రూపొందిస్తున్నాడు. తెలుగులోనూ రూపొంద‌నున్న ఈ చిత్రంలోని ఓ కీల‌క పాత్ర కోసం బాలీవుడ్ హీరో సునీల్ శెట్టిని చిత్ర బృందం ఖరారు చేసిన‌ట్లు తెలిసింది. ఇప్ప‌టి వ‌ర‌కు 110కు పైగా హిందీ చిత్రాల్లో న‌టించిన సునీల్ షెట్టి తొలిసారి క‌న్న‌డ చిత్రం `ప‌హిల్వాన్‌`లో న‌టించిన విష‌యం తెలిసిందే. సుదీప్ హీరోగా న‌టించిన ఈ చిత్రం ఇటీవ‌ల విడుద‌లై క‌న్న‌డ‌లో మెప్పించింది. సునీల్ శెట్టి పాత్ర ఆక‌ట్టుకుంద‌ని టాక్ వినిపించింది.

విష్ణు న‌టిస్తున్న `కాల్ సెంటర్‌` చిత్రంలో సునీల్ శెట్టి ఎలాంటి పాత్ర‌లో న‌టిస్తున్నారు అంటే.. ఓ ప‌వ‌ర్‌ ఫుల్ పోలీస్ ఆఫీస‌ర్ గా క‌నిపించ‌నున్నార‌ని.. త్వ‌ర‌లోనే ఆయ‌న షూటింగ్‌ లో పాల్గొన‌బోతున్న‌ట్టు చిత్ర వ‌ర్గాలు తెలిపాయి. గ‌త కొన్నేళ్లుగా స‌రైన విజ‌యం కోసం ఎదురుచూస్తున్న మంచు విష్ణుకు బాలీవుడ్ హీరో ఎంత వ‌ర‌కూ ప్ల‌స్ అవుతాడో చూడాలి. అలాగే మంచు మ‌నోజ్ చిత్రానికి కాస్టింగ్ కాల్ పిలుపునివ్వ‌డంతో అత‌డు తిరిగి రీఎంట్రీకి రెడీ అవుతున్నాడ‌నే భావించాల్సి వ‌స్తోంది.