మనోజ్‌, సుధీర్‌.. చెల్లుకు చెల్లు

నీకు నేను ఇది ఇస్తా. నాకు నువ్వు ఏది ఇస్తావ్‌? అన్నట్టుంది ఈ వ్యవహారం. మీ ఇంటికొస్తే ఏం ఇస్తావ్‌. మా ఇంటికొస్తే ఏం తెస్తావ్‌? అన్నట్టుండే ఈ సమాజంలో ఇది కొంత బెటరేనని చెప్పాలి. తన అక్క సినిమాలో అతిధి పాత్రలో నటించినందుకు మనోజ్‌ ఆ హీరో రుణం తీర్చుకుంటున్నాడు.

ఇంతకీ విషయం ఏమంటే మంచు లక్ష్మి ప్రసన్న కథానాయికగా నటిస్తున్న 'దొంగాట' చిత్రంలో ఓ అతిధి పాత్రకు హీరో అవసరం. అయితే అందుకు నేనున్నా.. అంటూ ముందుకొచ్చాడు సుధీర్‌బాబు. అందుకు ప్రతిగా ఇప్పుడు మనోజ్‌ నేనున్నా అంటూ సుధీర్‌బాబు సినిమాలో అతిధిపాత్రకు ఒప్పుకున్నాడు. సుధీర్‌ నటిస్తున్న తాజా చిత్రం మోసగాళ్లకు మోసగాడులో మనోజ్‌ ఓ కీలకపాత్రలో నటిస్తున్నాడు. కనిపించేది తక్కువ సమయమే అయినా ఆకట్టుకునే పాత్రలో నటిస్తున్నాడని సమాచారం.

ఇప్పటికే మనోజ్‌ పార్ట్‌ చిత్రీకరణ పూర్తయింది. నిర్మాణానంతర పనులు సాగుతున్నాయి. మే తొలివారంలో రిలీజ్‌ చేయాలన్నది ప్లాన్‌. మన హీరోలు ఇచ్చిపుచ్చుకోవాలన్న ధోరణితో ఉండడం మంచిదే. ఇలాంటి సుహృద్భావ వాతావరణంలో స్నేహంగా ఉంటే మరిన్ని మంచి ఫలితాల్ని అందుకునేందుకు ఆస్కారం ఉంది.