గుంటూరోడు.. ఆ రోజు వచ్చేస్తున్నాడు

శౌర్య.. ఎటాక్ సినిమాలతో గట్టి ఎదురు దెబ్బలే తిన్నాడు మంచు మనోజ్. దీంతో సినిమాల ఎంపికలో ఆచితూచి అడుగులేయాల్సి వచ్చింది మంచు హీరో. దాదాపు ఆరు నెలలు గ్యాప్ తీసుకుని.. ‘నా రాకుమారుడు’ ఫేమ్ ఎస్కే సత్య దర్శకత్వంలో ‘గుంటూరోడు’ అనే మాస్ మసాలా సినిమాకు శ్రీకారం చుట్టాడు. ‘కంచె’ భామ ప్రగ్యా జైశ్వాల్ కథానాయికగా నటించింది. ఫిబ్రవరి 17కే రిలీజ్ కావాల్సిన ఈ చిత్రం అనివార్య కారణాల వల్ల వాయిదా పడింది. ఈ చిత్రానికి కొత్త రిలీజ్ డేట్ ఇచ్చారు. మార్చి 3న ‘గుంటూరోడు’ను ప్రేక్షకుల ముందుకు తీసుకురాబోతున్నారు.

మార్చి 3కు ఆల్రెడీ మూడు చిన్న సినిమాలు షెడ్యూల్ అయి ఉన్నాయి. చాన్నాళ్లుగా వాయిదా పడుతున్న అంజలి సినిమా ‘చిత్రాంగద’ మార్చి 3కే రిలీజ్ డేట్ ఫిక్స్ చేసుకుంది. అలాగే ‘పెళ్లిచూపులు’ హీరో విజయ్ దేవరకొండ నటించిన ‘ద్వారక’ కూడా మార్చి 3కే ఫిక్సయింది. దీంతో పాటు తమిళ డబ్బింగ్ మూవీ ‘మెట్రో’ కూడా ఆ రోజే రానుంది. ఈ సినిమాకు ‘గుంటూరోడు’తో ఇబ్బందులు తప్పవు. ఎందుకంటే ఇది పక్కా మాస్ మసాలా సినిమాలా కనిపిస్తోంది. ఈ మధ్య మాస్ సినిమాలు తగ్గిపోయి ఆ వర్గం ప్రేక్షకులు తమ అభిరుచికి తగ్గ సినిమాల కోసం ఆసక్తిగా ఎదురు చూస్తున్నారు. మనోజ్ నుంచి కూడా మంచి మాస్ సినిమా వచ్చి చాలా కాలమైంది. అతడికి బాగా కలిసొచ్చినవి మాస్ సినిమాలే. మరి ‘గుంటూరోడు’తో మనోజ్ మాస్ ను ఎలా అలరిస్తాడో చూద్దాం.

Like Us on Facebook : https://www.facebook.com/Tupakidotcom/