ఒక్కడు వెనక్కు వెళ్లాడు

ఇమేజ్ పట్టించుకోకుండా డిఫరెంట్ సినిమాలు చేస్తాడని మంచు మనోజ్ కు పేరుంది. పేరయితే వచ్చింది గానీ ఫేట్ కలిసిరావడం లేదు. ఈమధ్య కాలంలో మనోజ్ కు కమర్షియల్ హిట్ అందని ద్రాక్షయి కూర్చుంది. వచ్చిన సినిమాలు వచ్చినట్టే ఫ్లాపై థియేటర్ల నుంచి వెళ్లిపోతున్నాయి. ఇలా కాదని మామూలు కథతో యాక్షన్ ఎంటర్ టెయినర్ గా తీసిన గుంటూరోడు కూడా ప్రేక్షకులకు నచ్చలేదు. దీంతో మనోజ్ ఆశలన్నీ తర్వాత రాబోయే ‘ఒక్కడు మిగిలాడు’ పైనే ఉన్నాయి.

శ్రీలంక దేశంలో 90ల నాటి అంతర్యుద్ధ పరిస్థితుల కథతో ‘ఒక్కడు మిగిలాడు’ తెరకెక్కుతోంది. ఈ సినిమాలో మనోజ్ డ్యూయల్ రోల్ చేస్తున్నాడు అందులో ఒకటి తమిళ ఈలం నాయకుడు వేలుపిళ్లై ప్రభాకరన్ ను పోలిన పాత్ర కాగా.. రెండోది స్టూడెంట్ లీడర్ పాత్ర. ఆ మధ్య మనోజ్ పుట్టిన రోజు సందర్భంగా రెండు గెటప్ లను రివీల్ చేశారు. తెలుగు తెరపై ఇంతవరకు రాని కథాంశం కావడంతో ‘ఒక్కడు మిగిలాడు’పై ఆసక్తి బాగానే క్రియేట్ అయింది. ముందు అనౌన్స్ చేసిన ప్రకారం ఈ సినిమా సెప్టెంబర్ లోనే రావాలి. కానీ ఇప్పుడు అక్టోబర్ వరకు వాయిదా వేశారు. పోస్టు ప్రొడక్షన్ వర్క్ కారణంగా రిలీజ్ వాయిదా వేశామని మనోజ్ ట్విట్టర్ లో ప్రకటించాడు.

ఒక్కడు మిగిలాడు సినిమా రిలీజ్ ప్లాన్ చేసిన సమయానికి థియేటర్లకు సినిమాలు వరస కట్టాయి. వీటిలో పెద్ద సినిమాలతో పాటు ఇప్పటికే క్రేజ్ వచ్చిన మూవీస్ సైతం ఉన్నాయి. ఒక్కడు మిగిలాడు షూటింగ్ సుదీర్ఘ కాలంగా సాగుతోంది. ఓ రకంగా ఇప్పటికే చాలా లేటయిందని చెప్పాలి. అయినా పోటీలో రిలీజ్ చేయడానికి మేకర్స్ ఎందుకో సాహసించడం లేదు. సినిమా కోసం ఇప్పటికే బాగా ఖర్చు పెట్టి ఉండటంతో ఇంత పోటీలో రిలీజ్ చేస్తే నష్టపోవాల్సి వస్తుందన్న ఆలోచనతోనే వెనక్కు వెళ్లినట్టు కనిపిస్తోంది.