మంచు మనోజ్.. హాలీవుడ్ మ్యూజిక్ డైరెక్టర్

మంచు మనోజ్ కేవలం నటుడే కాదు.. అతడిలో వేరే కళలు కూడా చాలా ఉన్నాయి. అతను ఫైట్లు కంపోజ్ చేస్తాడు. డ్యాన్సులు వేస్తాడు. పాటలు రాస్తాడు.. పాడతాడు. ఇప్పుడు మనోజ్ లోని మరో కళ బయటికి వచ్చింది. అతను సంగీత దర్శకుడిగా మారాడు. అతను సంగీతం అందించింది హాలీవుడ్ సినిమాకు కావడం విశేషం. ఆ సినిమా పేరు.. బాస్మతి బ్లూస్.

మనోజ్ అక్క మంచు లక్ష్మి ఈ చిత్రంలో ఓ కీలక పాత్ర పోషించింది. అందులో ఆమె పాత్ర పేరు.. సీత. ఆస్కార్ విన్నింగ్ నటి బ్రీ లార్సన్ ‘బాస్మతి బ్లూస్’లో కథానాయికగా నటించింది. ఈ చిత్రం ఇటీవలే హాలీవుడ్లో విడుదలైంది కూడా. ఆన్ డిమాండ్ ఈ సినిమాకు షోలు వేస్తున్నారు. దీనికి తన స్నేహితుడు.. సంగీత దర్శకుడు అచ్చు రాజమణితో కలిసి మనోజ్ సంగీతాన్నందించాడట.

అచ్చు.. మనోజ్ నటించిన చాలా సినిమాలకు మ్యూజిక్ చేశాడు. అతడితో మనోజ్ కు వ్యక్తిగతంగా మంచి స్నేహమే ఉంది. తనతో అచ్చు పని చేసిన ప్రతి సినిమాకూ మనోజ్ సంగీత చర్చల్లోనూ పాల్గొన్నాడు. ఆ అనుభవంతోనే ఇప్పుడు అతడితో కలిసి ‘బాస్మతి బ్లూస్’కు సంగీతం సమకూర్చాడట మనోజ్. మరి మనోజ్ మ్యూజికల్ టాలెంటుకి హాలీవుడ్లో ఏమాత్రం పేరొస్తుందో చూడాలి. వరుస ఫ్లాపులతో సతమతమవుతున్న మనోజ్.. త్వరలోనే తన కొత్త సినిమాను మొదలుపెట్టనున్నాడు. మేలో సెట్స్ మీదికి వెళ్లే ఈ చిత్రంతో ఓ కొత్త దర్శకుడు ఇండస్ట్రీ పరిచయం కాబోతున్నట్లు సమాచారం.