మంచు విష్ణు.. అది కాదు ఇది

మంచు విష్ణు కెరీర్ ఏమాత్రం ఆశాజ‌న‌కంగా లేదు కొన్నేళ్లుగా. చివ‌ర‌గా అత‌నెప్పుడు హిట్టు కొట్టాడో కూడా ప్రేక్ష‌కుల‌కు గుర్తు లేదు. వ‌రుస‌గా డిజాస్ట‌ర్ల మీద డిజాస్ట‌ర్లు ఇచ్చిన విష్ణు.. మ‌ధ్య‌లో కొంచెం గ్యాప్ తీసుకుని, త‌ర్వాత మోస‌గాళ్ళు అనే సినిమాతో వ‌చ్చాడు. హాలీవుడ్ డైరెక్ట‌ర్.. 50 కోట్ల బ‌డ్జెట్, ఇంగ్లిష్‌లో రిలీజ్.. అంటూ ఈ సినిమా గురించి ఘ‌న‌మైన ప్ర‌క‌ట‌న‌లే చేశాడు విష్ణు.

తీరా చూస్తే తెలుగులో కూడా ఈ సినిమా తుస్సుమ‌నిపించింది. మ‌రీ నాసిర‌కం సినిమా కావడంతో మ‌న ప్రేక్ష‌కులే దాన్ని తిర‌స్క‌రించారు. ఈ సినిమా మీద ఐదారు కోట్లు కూడా ఖ‌ర్చు పెట్టి ఉంటారా అన్న‌ది డౌటే అనిపించింది. ఈ దెబ్బ‌తో విష్ణు కెరీర్ మ‌రింత ప‌త‌న‌మైంది. ఐతే ఈసారి కాస్త పేరున్న ద‌ర్శ‌కుడితో ఓ హిట్ సినిమా సీక్వెల్ చేయాల‌ని విష్ణు ప్లాన్ చేసుకున్నాడు. అదే.. ఢీ అండ్ ఢీ. వ‌రుస డిజాస్ట‌ర్ల‌తో కాస్త పేరున్న హీరోలెవ‌రూ ప‌ట్టించుకోని స్థితికి చేరుకున్న శ్రీను వైట్ల‌.. ఈ ఢీ సీక్వెల్‌కు ద‌ర్శ‌కత్వం వ‌హించాల్సింది.

ఐతే ఏడాది కింద‌టే ఈ సినిమా ఓకే అయినా.. ఇప్ప‌టిదాకా సెట్స్ మీదికి వెళ్ల‌లేదు. ఎందుకు ఆల‌స్యం అవుతోందో ఎవ‌రికీ అర్థం కావ‌ట్లేదు. ఇప్పుడేమో ఢీ సీక్వెల్ వెన‌క్కి వెళ్లిన‌ట్లు వార్త‌లొస్తున్నాయి. ఆ సినిమా క్యాన్సిల్ కాలేదు కానీ.. మంచు విష్ణు ముందు ఈ సినిమా చేయ‌ట్లేదు. వేరే థ్రిల్ల‌ర్ మూవీని ఓకే చేసి దాన్నే ముందు ప‌ట్టాలెక్కించ‌బోతున్నాడ‌ట‌.

ఈ చిత్రాన్ని రాజేంద్ర అనే కొత్త ద‌ర్శ‌కుడు డైరెక్ట్ చేయ‌బోతున్న‌ట్లు తెలిసింది. ఇందులో మంచు విష్ణు రా ఆఫీస‌ర్ పాత్ర చేయ‌నున్నాడ‌ట‌. రేసీగా ఉండే థ్రిల్ల‌ర్ మూవీ ఇదంటున్నారు. విష్ణుకు స్క్రిప్టు బాగా న‌చ్చేసి సొంత బేన‌ర్లో ప్రొడ్యూస్ చేయ‌డానికి ముందుకొచ్చాడు. త‌న కెరీర్‌కు ఇది ఊపు తెస్తుందని, దీని త‌ర్వాత ఢీ సీక్వెల్ చేస్తే బాగుంటుంద‌ని విష్ణు భావిస్తున్నాడ‌ట‌. కాబ‌ట్టి విష్ణు కోసం కూడా వెయిటింగ్‌లో ఉండాల్సిన ప‌రిస్థితి శ్రీను వైట్ల‌కు త‌లెత్తుతోంది.