‘ఓటర్’తో సూపర్ స్టార్ అయిపోతాడట

తన కొత్త సినిమా ‘ఓటర్’ తనను సూపర్ స్టార్‌ ను చేసే సత్తా ఉన్న సినిమా అని మంచు విష్ణు అన్నాడు. అది క్లిక్ అయితే ఎక్కడికో వెళ్లిపోతుందని విష్ణు చెప్పాడు. ‘‘ఓటర్ ఒక వైవిధ్యమైన కథతో తెరకెక్కుతున్న హార్డ్ హిట్టింగ్ మూవీ. అదొక పొలిటికల్ డ్రామా. ఓటేసేవాడు యజమాని.. గెలిచినవాడు సేవకుడు అని చెప్పే కథ ఇది. ఈ సినిమా చూసి కొంతమందైనా మారతారన్నది మా నమ్మకం. నన్ను ఓ సూపర్ స్టార్ రేంజికి తీసుకెళ్లే మూవీ ‘ఓటర్’. సరిగ్గా తగిలిందంటే ఆ సినిమా నాకు ‘అసెంబ్లీ రౌడి ’ కావచ్చు’’ అని విష్ణు అన్నాడు.

ఇక ‘గాయత్రి’ సినిమాలో తన పాత్ర గురించి విష్ణు చెబుతూ.. ‘‘నటుడిగా నన్ను నేను నిరూపించుకునే చిత్రమిది. నేను నటనకు పనికి వస్తానా లేదా అన్నది ఈ సినిమాతోనే డిసైడైపోతుంది. ఈ సినిమాలో నేను 15-20 నిమిషాలు మాత్రమే కనిపిస్తాను. కానీ పూర్తి సినిమా చూపించేంత ప్రభావం ఇది చూపిస్తుంది. ఈ పాత్ర కూడా మా నాన్నగారే చేయాల్సింది. కానీ నేను చేస్తా అని దర్శకుడిని అడిగి మరీ చేశాను. అలా అడిగేసరికి ఆయన ఇబ్బంది పడ్డారు. కానీ తర్వాత మా నాన్న కూడా ఓకే చెప్పడంతో సరే అన్నారు. నటుడిగా నాకు ఒక గౌరవం తీసుకొచ్చే పాత్ర అవుతుందని అనుకుంటున్నా. ఇప్పటిదాకా నేను చాలా వరకు హుషారుగా.. వినోదాత్మకంగా ఉండే పాత్రలే చేశా. కానీ ఇది పూర్తిగా సెంటిమెంటుతో కూడిన పాత్ర. ప్రేక్షకుల గుండెలు పిండేసేలా ఉంటుంది’’ అని విష్ణు తెలిపాడు. తాను నటించిన మరో సినిమా ‘ఆచారి అమెరికా యాత్ర’ ఎప్పుడు రిలీజవుతుందో కచ్చితంగా చెప్పలేనని.. ఆ సినిమా అనుకున్న సమయానికి రిలీజవ్వదేమో అని ముందు నుంచి కొడుతూనే ఉందని విష్ణు తెలిపాడు.